სამართალი
მთავარ პროკურატურაში საქართველოს ყოფილი მინისტრები დიმიტრი ქუმსიშვილი და ზურაბ ალავიძე გამოკითხეს
საქართველოს მთავარ პროკურატურაში საქართველოს ყოფილი მინისტრები დიმიტრი ქუმსიშვილი და ზურაბ ალავიძე გამოკითხეს.
როგორც უწყებაში აცხადებენ, ყოფილი მინისტრები ეკონომიკისა და ინფრასტრუქტურის სამინისტროებში საბიუჯეტო თანხების მითვისება/გაფლანგვის საქმეზე გამოკითხეს.
მათივე ცნობით, მთავარი პროკურატურის საგამოძიებო ნაწილში მიმდინარეობს გამოძიება საქართველოს ეკონომიკისა და მდგრადი განვითარების სამინისტროს, ასევე რეგიონული განვითარებისა და ინფრასტრუქტურის სამინისტროს ცალკეულ მოხელეთა მიერ სამსახურებრივი უფლებამოსილების ბოროტად გამოყენებისა და დიდი ოდენობით საბიუჯეტო თანხების მართლსაწინააღმდეგოდ მითვისება/გაფლანგვის ფაქტებზე.
პროკურატურაში აცხადებენ, რომ საქმეზე გრძელდება გამოძიება და შედეგების შესახებ დამატებით ეცნობება საზოგადოებას.
ცნობისთვის, განახლებული მინისტრთა კაბინეტის საკომიტეტო მოსმენების დროს, 13 ივლისს ნაციონალური მოძრაობის დეპუტატი რომან გოცირიძე დაინტერესდა რამდენად შეესაბამება სიმართლეს ინფორმაცია, რომ ყოფილ მინისტრებს დიმიტრი ქუმსიშვილისა და ზურაბ ალავიძის ქვეყნიდან გასვლა აუკრძალეს.
თავის მხრივ, როგორც შს მინისტრმა გიორგი გახარიამ აღნიშნა, რომან გოცირიძე ჭორებს ავრცელებს.
"ყველა იქ არის სადაც უნდა, ზაფხულია ზოგი შვებულებაშია, ზოგი ისვენებს", - განაცხადა გიორგი გახარიამ.