სამართალი

მთავარ პროკურატურასთან შეხვედრის აზრს ვერ ვხედავ-გიორგი პაპუაშვილი

საქართველოს საკონსტიტუციო სასამართლოს თავმჯდომარე გიორგი პაპუაშვილი ამ დროისთვის მთავარ პროკურორთან შეხვედრის აზრს ვერ ხედავს.

როგორც პაპუაშვილმა ჟურნალისტებს არასამთავრობო ორგანიზაციებთან შეხვედრის დაწყებამდე განუცხადა, იქამდე სანამ ნდობა არ გაჩნდება პროკურატურის მიმართ, ასეთი შეხვედრის გამართვას აზრი არ აქვს.

„არასამთავრობო ორგანიზაციების წარმომადგენლებს დამატებით ინფორმაციას მივაწვდი. ორჯერ გაგზავნილია წერილი მთავარ პროკურატურაში ზეწოლის ფაქტებზე, არც ერთზე რეაგირება არ ყოფილა. წერილიც კი არ გამოუგზავნიათ. ორჯერ ტელევიზიით განვაცხადე, მათ შორის იუსტიციის მინისტრზე, მაგრამ გამოძიება არ ყოფილა. არავითარი ნდობა არ არის. ამიტომ უნდა შევიმუშაოთ მექანიზმი პრეზიდენტთან, პოლიტიკურ ხელმძღვანელობასთან ერთად ნდობა აღდგეს, რომ მოსამართლეებმა საგამოძიებო ორგანოს ინფორმაცია მიაწოდონ”, - განაცხადა გიორგი პაპუაშვილმა.

მისივე თქმით, ირაკლი შოთაძესთან შეხვედრის აზრს ჯერ-ჯერობით ვერ ხედავს.

„მგლების ხახაში რომ წერილებს აგზავნი და იქიდან კიდევ რაღაცას გიგზავნიან, არ შეიძლება შეხვედრა. თუ შევთანხმდებით პოლიტიკურ ხელმძღვანელობასთან, მაშინ აზრი ექნება მისვლას. პრემიერ-მინისტრი როცა მოიცლის შევხვდები აუცილებლად“, - განაცხადა პაპუაშვილმა.