უახლესი ამბები
- 19.03.2024 14:18ტყუის ოცნება, როცა ამბობს, რომ ე.წ. ვეტინგის პროცედურა მოსამართლეთა დანიშვნას გულისხმობს უცხოელების მიერ - ნიკა გვარამია
- 19.03.2024 12:51„კართაგენი უნდა დაინგრეს“, „ნაციონალური მოძრაობა“ კი უნდა გასამართლდეს და გასამართლდება კიდეც - სოზარ სუბარი
- 19.03.2024 12:27ცოდნაზე დაფუძნებული, ინოვაციური ეკონომიკის განვითარებას ჩვენი ქვეყნის წინსვლისთვის განსაკუთრებული მნიშვნელობა აქვს - ირაკლი კობახიძე
- 19.03.2024 12:18ირაკლი კობახიძე UFC-ის ჩემპიონს, ილია თოფურიას შეხვდა
- 19.03.2024 12:04ირაკლი ჩიქოვანი დანიის სამეფოს ელჩსა და თავდაცვის ატაშეს შეხვდა
- 19.03.2024 10:50ოქროს კონტრაბანდის ფაქტზე ორი პირი დააკავეს
არქივი
საზოგადოება
მთავრობას არ გამოუვლენია სურვილი, რომ ფარული ჩანაწერების ეპოქა დასრულებულიყო - ელენე ხოშტარია
ფრაქცია „ევროპული საქართველოს“ წევრის ელენე ხოშტარიას განცხადებით, საპარლამენტო უმრავლესობის მიერ წარმოდგენილი კანონპროექტი ვერ უზრუნველყოფს ფარული საგამოძიებო მოქმედების განმახორციელებელი ახალი ორგანოს დამოუკიდებლობას მთავრობისგან.
„ნება იმისა, რომ ფარული ჩანაწერების ეპოქა დასრულებულიყო მთავრობას არ გამოუვლენია. ამასთან ერთად, სუს-ის ბიუჯეტში 18 მილიონი ემატება და აქ მთავრობის პრიორიტეტი ნათლად ჩანს. ჩვენ ვსაუბრობთ იმაზე, რომ მთავრობა ნიშნავს უწყების ხელმძღვანელს, რომელმაც ეს საკითხები უნდა გადაწყვიტოს. რა თქმა უნდა, ეს პოლიტიკური დანიშვნა იქნება. სამწუხაროდ, არანაირი პრობლემის გადაჭრაზე არ არის საუბარი,“- თქვა ხოშტარიამ ჟურნალისტებთან საუბრისას.
საპარლამენტო უმრავლესობის წევრის არჩილ თალაკვაძის თქმით, ცვლილებათა პაკეტი ამცირებს მოქალაქეების პირად ცხოვრებაზე მეთვალყურეობის რისკს.
„პაკეტი , რომელიც არის შემოთავაზებული, გულისხმობს ფარული საგამოძიებო ფუნქციის დამოუკიდებლად გატანასა და გადაცემას ახალი სააგენტოსთვის, რომელსაც არ გააჩნია საგამოძიებო ფუნქცია. მინიმუმამდე დადის რისკები, რომ მოხდეს ვინმეს პირად ცხოვრებაში ჩარევა,“- ამბობს თალაკვაძე.
შეგახსენებთ, რომ გუშინ უმრავლესობამ დახურულ შეხვედრაზე წარადგინა პროექტი, რომლის თანახმად, ფარულ მოსმენებს ახალი დამოუკიდებელი უწყება განახორციელებს. უწყებას საგამოძიებო ფუნქცია არ ექნება და ის იქნება ანგარიშვალდებული პარლამენტისა და პრემიერ-მინისტრის წინაშე. ორგანოს ხელმძღვანელს პრემიერ-მინისტრი დანიშნავს. უწყება უსაფრთხოების სამსახურთან არსებული საჯარო სამართლის იურიდიული პირი იქნება.
ცვლილებების შეტანა საკონსტიტუციო სასამართლოს განაჩენის შემდეგ გახდა აუცილებელი. მან 2016 წლის აპრილში ფარული მოსმენების არსებული წესი არაკონსტიტუციურად ცნო. საკონსტიტუციო სასამართლომ პარლამენტს 2017 წლის 31 მარტამდე მისცა ვადა, რომ შეცვალოს არსებული კანონმდებლობა.
ანა მებურიშვილი