ეკონომიკა
მთავრობის გასაგონად მინდა ვთქვა - დავით ბაქრაძე
მთავრობის გასაგონად მინდა ვთქვა, ლარის კურსის ვარდნა არის უზარმაზარი პრობლემა ჩვენი მოსახლეობისთვის, ქვეყნისთვის, ეკონომიკისთვის, რასაც სჭირდება მთავრობა, ხელისუფლება, რომელიც ქმედით ნაბიჯებს გადადგამს პრობლემის მოსაგვარებლად, - განაცხადა „ევროპული საქართველოს“ პრეზიდენტობის კანდიდატმა, დავით ბაქრაძემ საგანგებოდ გამართულ ბრიფინგზე.
დავით ბაქრაძე ეკონომიკის მინისტრის განცხადებას გამოეხმაურა, რომლის თქმითაც, ეროვნული ვალუტის კურსის მერყეობა ,,ჩვენს ეკონომიკას იცავს“.
„ჩვენი მოსახლეობა კიდევ ერთხელ დადგა იმ მტკივნეული პრობლემის წინაშე, რომელიც ლარის კურსის დაცემა უკავშირდება. ხელისუფლებისგან არ მოგვისმენია, კომენტარი, რის გაკეთებას აპირებს მთავრობა და როგორ აპირებს, დაეხმაროს მოსახლეობას, რომელიც ზარალდება ლარის კურსის გაუფასურებისგან. მთავრობის სხდომაზე ეკონომიკის მინისტრის პირველი კომენტარი მოვისმინეთ, რომელიც ცდილობს ჩვენს მოსახლეობას აუხსნას, რომ ლარის კურსის ცვალებადობა და მერყეობა კარგია.
მინდა, პატივცემულ მინისტრს და მთვარობის წევრებს შევახსენო, ლარის კურსის მერყეობა, ლარის გაუფასურება არის ის მტკივნეული თემა, რომლის გამოც მოსახლეობას ბოლო წლებში რამდენჯერმე მოუწია გაზრდილ კომუნალურ გადასახადებთან გამკლავება, ეს არის ის მტკივნეული თემა, რომლის გამოც ასეულობით ათას ოჯახს უწევს გაზრდილი კრედიტების გადახდა . ეს არის ის მტკივნეული თემა, რომლის გამოც ყოველდღიურად ქვეყანაში ძვირდება საკვები პროდუქტები და მედიკამენტები და რომლის გამოც, უახლოეს დღეებში შესაძლოა მოხდეს პურის გაძვირება. ლარის არასტაბილურობა არის ის საკითხი, რომელიც ყველაზე დიდი პრობლემის მომტანია ბიზნესისთვის, ვინაიდან არ არსებობს არანაირი პროგნოზირებადობა და ბიზნესს უჭირს დაგეგმოს ხვალინდელი დღე. ეს მტკივნეული პროცესი ადასტურებს ცვლილებების აუცილებლობას და აუცილებლობას, რომ არჩევნებით პოლიტიკურ მოუსავლეთში გავუშვათ ხელისუფლება,“- განაცხადა დავით ბაქრაძემ.