რეგიონები

მტკვრის ადიდების გამო, ავტომობილში მყოფი 30 წლამდე მამაკაცი მდინარეში აღმოჩნდა

კასპში, სოფელ ზემო ხანდაკის მიმდებარედ, მდინარე მტკვრის მოულოდნელად ადიდების გამო, მსუბუქ ავტომობილში მყოფი 30 წლამდე მამაკაცი მდინარეში აღმოჩნდა.

შსს-ს მეხანძრე მაშველებმა მისი უვნებლად გამოყვანა შეძლეს.

როგორც შინაგან საქმეთა სამინისტროს საგანგებო სიტუაციების მართვის სააგენტოში აცხადებენ, 112-დან შევიდა შეტყობინება, რომ მსუბუქ ავტომობილში მყოფი 30 წლამდე მამაკაცი, რომელიც ადგილზე სამშენებლო დანიშნულების ტრაქტორს დარაჯობდა, მდინარეში აღმოჩნდა.

სააგენტოს ინფორმაციით, გორის სამაშველო განყოფილების მაშველთა ჯგუფი შემთხვევის ადგილზე მივიდა.

სწრაფი დინების მიუხედავად, მაშველები ადიდებულ მდინარეში ნავით შევიდნენ და მამაკაცი უსაფრთხო ადგილზე გადაიყვანეს.

ამ დროისთვის, მის სიცოცხლეს და ჯანმრთელობას საფრთხე არ ემუქრება.