პოლიტიკა
მცხეთის საკრებულოს წევრები მოითხოვენ, ქალაქს თვითმმართველი ერთეულის სტატუსი დარჩეს
ქალაქ მცხეთის საკრებულოს წევრები ქალაქისთვის თვითმმართველი ერთეულის სტატუსის შესაძლო გაუქმებასთან დაკავშირებით განცხადებას ავრცელებენ.
საკრებულოს წევრები ფიქრობენ, რომ ქალაქების კვლავ სათემო მუნიციპალიტეტებთან გაერთიანება დემოკრატიული პროცესებისა და დეცენტრალიზაციის მიმართულებით უკან გადადგმული ნაბიჯი იქნება.
მათივე თქმით, ქალაქ მცხეთას საკუთარი თვითმმართველობა უნდა მართავდეს და მიმართავენ საქართველოს მთავრობასა და პარლამენტს მოთხოვნით, რომ არ მოხდეს ქალაქ მცხეთის მუნიციპალიტეტისა და მცხეთის თემის მუნიციპალიტეტის კვლავ გაერთიანება.
"აქ საქმე არ ეხება მხოლოდ 7 თვითმმართველი ქალაქის თემებთან გაერთიანებას, რაც თავისთავად დემოკრატიული პროცესებისა და დეცენტრალიზაციის მიმართულებით უკანგადადგმული ნაბიჯია. მცხეთა, როგორც ქართული სახელმწიფოებრიობისა და მართმადიდებლობის საწყისი, მსოფლიო კულტურული მემკვიდრეობის რანგშია აყვანილი. შესაბამისად მის მართვას, განსაკუთრებული სპეციფიკა და საერთაშორისო პასუხისმგებლობა გააჩნია. შესაბამისად ჩვენ, საკრებულოს წევრებს, ერთმნიშვნელოვნად მიგვაჩნია, რომ ქალაქ მცხეთას უნდა მართავდეს საკუთარი თვითმმართველი ერთეული, რომლის ქმედებებშიც სრულად უნდა იყოს ასახული კულტურული მემკვიდრეობის ინტეგრირებული მართვისა და ქალაქის მდგრადი განვითარების მექანიზმები. ზემოაღნიშნულიდან გამომდინარე, როგორც საქართველოს მთავრობას, ისე პარლამენტს, მივმართავთ მოთხოვნით, რომ არ მოხდეს ქალაქ მცხეთის მუნიციპალიტეტისა და მცხეთის თემის მუნიციპალიტეტის გაერთიანება.", - ნათქვამია განცხადებაში.
საკრებულოს წევრები ასევე, მოითხოვენ, რომ იუნესკოს მსოფლიო მემკვიდრეობის ცენტრის რეკომენდაციების შესაბამისად, მცხეთის ჯვარი, მისი კულტურული მემკვიდრეობის დაცვით ზონაში არსებული ტერიტორიებით, ქალაქის ადმინისტრაციულ საზღვრებში მოექცეს.
"მცხეთა, თავისი ურბანული სპეციფიკიდან გამომდინარე, არა მარტო თვითმმართველი ქალაქი უნდა იყოს, არამედ მისთვის უნდა მოქმედებდეს განსაკუთრებული ეკონომიკური რეჟიმიც, რათა კიდევ უფრო მეტი გასაქანი მიეცეს ტურიზმისა და მისი თანმხლები დარგების განვითარებას. ჩვენ მხოლოდ ფინანსურ სიძლიერეზე არ ვართ ორიენტირებული. მოწესრიგებული ქალაქი იქნება მაგალითი იმისა, რომ ჩვენი წარსული კულტურის დიდება დღესაც გრძელდება. ჩვენ უნდა ჩამოვყალიბდეთ საზოგადოებად, რომელსაც არა მარტო მსოფლიო მემკვიდრეობის მოვლა-პატრონობა, არამედ, მის ფონზე, დღევანდელი თვითმყოფადობის წარმატებული მაგალითების წარმოჩინებაც შეუძლია’’, - აცხადებენ საკრებულოს წევრები.
მიმართვას ხელს საკრებულოს თავმჯდომარე ილია ჯიშკარიანი და წევრები აწერენ.
ნინო ექვთიმიშვილი