საზოგადოება

მუხთარლი ჟურნალისტი ყოფილა - ალექსანდრე ჯეჯელავას განმარტება გუშინდელ განცხადებაზე

საქართველოს განათლებისა და მეცნიერების მინისტრის, ალექსანდრე ჯეჯელავას თქმით, მისი გუშინდელი განცხადება, რომ საქართველოში გაუჩინარებული აფგან მუხთარლი ჟურნალისტი არ იყო, არასწორ ინფორმაციაზე იყო დაფუძნებული.

„ეს ადამიანი „რადიო თავისუფლებაში“ იყო უსაფრთხოების სამსახურის უფროსი, თუმცა ამავე დროს არის ჟურნალისტური გამოძიებების ავტორიც, შესაბამისად, ორივე როლი ჰქონდა“, - განუცხადა ჯეჯელევამ ჟურნალისტებს.

შეგახსენებთ, გუშინ აზერბაიჯანელი ჟურნალისტის საქმის კომენტირებისას, მინისტრმა განაცხადა, რომ მუხთარლი „რადიო თავიუსფლების“ დაცვაში მუშაობდა.

ჯეჯელავამ ასევე სრულად გამორიცხა ის ფაქტი, რომ შესაძლოა, ქართული მხარე მონაწილეობდა ჟურნალისტის აზერბაიჯანისთვის გადაცემაში. მისი თქმით, მსგავს ინფორმაციას ოპოზიცია ავრცელებს.
აზერბაიჯანელი ჟურნალისტი და აქტივისტი აფგან მუხტარლი 29 მაისს გაუჩინარდა. მომდევნო დღეს კი გავრცელდა ინფორმაცია, რომ ჟურნალისტი ბაქოს სახელმწიფო საზღვრის სამსახურის საგამოძიებო განყოფილებაში იმყოფებოდა.

31 მაისს აზერბაიჯანულმა მედიამ აზერბაიჯანის გენერალურ პროკურატურაზე დაყრდნობით გაავრცელა ინფორმაცია, რომ 29 მაისს, ადგილობრივი დროით 22:40 საათზე მუხთარლი ბალაქანის რაიონში, აზერბაიჯანის საზღვარზე უკანონოდ გადაკვეთისა და დეკლარაციის გარეშე დიდი ოდენობით თანხის გადატანის ბრალდებით დააკავეს.

გუშინ მუხთარლის სასამართლო პროცესი გაიმართა. როგორც აზერბაიჯანელმა ჟურნალისტმა, ჰადიჯა ისმაილიმ დაწერა ფეისბუკის საკუთარ გვერდზე, მუხთარლის სამთვიანი წინასწარი პატიმრობა შეეფარდა.

ანა მებურიშვილი