პოლიტიკა

მურთაზ კიკორია არის ერთ-ერთი აქტიური თანამონაწილე ძალადობრივი ჯგუფის - დარეჯან სილაგაძე

ეროვნული ბანკის საბჭოს ახალარჩეული წევრის, მურთაზ კიკორიას გარშემო სკანდალი გრძელდება.

ეს იყო ტელეკომპანია „იბერიას“ გადაცემა ,,პრიორიტეტის’’ მთავარი თემაც.
ოპოზიციის შემდეგ მურთაზ კიკორიას საქმის გამოძიებას დაზარალებული სილაგაძეების ოჯახი მოითხოვს.

კიკორიას, რომელიც წლების განმავლობაში ,,საქართველოს ბანკის’’ გენერალური დირექტორის თანამდებობაზე მუშაობდა, ბანკის დამფუძნებლის ქონების მითვისებაში ადანაშაულებენ. სილაგაძეები ამტკიცებენ, რომ კიკორიამ სხვა პირებთან ერთად ძალადობრივი გზით ელგუჯა სილაგაძეს წილი წაართვა.

,,საქართველოს ბანკის’’ სამი დამფუძნებლიდან ვლადიმერ პატეიშვილი და ელგუჯა სილაგაძე გარდაცვლილია, მესამე დაფუძნებელი კი, ქვეყნიდან არის წასული. სილაგაძის და, დარეჯან სილაგაძე აცხადებს, რომ მისი ძმა და პატეიშვილი ამ ძალადობრივ ქმედებებს შეეწირნენ და საქმის სასწრაფო გამოძიებას ითხოვენ.

,,მურთაზ კიკორია არის ერთ-ერთი აქტიური თანამონაწილე იმ ძალადობრივი ჯგუფისა, რომელმაც წაართვა საკუთრება ჩემ ძმას, რამაც გამოიწვია მისი გარდაცვალება.

ბატონი, მურთაზ კიკორია სამმართველოს უფროსი იყო და მე რომც არ ვთქვა, მგონი საეჭვო არ უნდა იყოს ის, რომ დამოუკიდებლად ამ საკითხს ის ვერ გადაწყვეტდა. ყოველ შემთხვევაში, ფაქტია, რომ ბატონ გილაურთან, რომელიც შემდეგ გენერალური დირექტორი გახდა და ბატონ გურგენიძესთან, რომელიც ასევე, არამარტო გენერალური დირექტორი გახდა დასახელებული ბანკის, დანაშაულებრივ კავშირში იმყოფებოდა. დილის 9 საათიდან ღამის 4 თუ 3 საათამდე, ეს დიაბეტით დაავადებული კაცი აშიმშილეს მთელი დღე და წინასწარ გამზადებულ ყალბ დოკუმენტებზე აიძულეს ხელი მოეწერა’’, - განაცხადა დარეჯან სილაგაძემ ,,პრიორიტეტის’’ ეთერში.

თემაზე განცახდება გააკეთა უმრავლესობის დეპუტატმა, დავით ჭიჭინაძემაც.

,,საქართველოს ბანკი არის ნაცმოძრაობის ბანკი, ასე რომ ვთქვათ. ძირითადად, ამ ბანკმა მოახდინა 2008 წლის მერე ყველა ბიზნესის უზურპაცია. დაკავშირებული პირები არიან; გილაური იყო პრემიერ-მინისტრი და მისი ძმა იყო ამ ბანკის მმართველი. მნიშვნელობა არ აქვს თანამდებობებზე იქნებიან ეს ადამიანები, თუ არ იქნებიან, უბრალოდ თქვენ გახსოვთ, რომ მანამდე იყო გურგენიძე, რომელიც საქართველოს ბანკიდან პრემიერ-მინისტრად წავიდა. საერთოდ ამ ბანკს უარყოფითი როლი მიუძღვის ქართულ ბიზნესთან მიმართებაში, განსაკუთრებით 2008 წლის შემდეგ, იმიტომ, რომ ძირითადად, ყველა დაკარგული ქონება, ყველა წართმეული ქონება ასოცირდება საქართველოს ბანკთან’’, - განაცხადა დავით ჭიჭინაძემ.