სამართალი
მუსტაფა ემრე ჩაბუქის საქმეზე დღეს მე არა პოლიტიკური, არამედ სამართლებრივი გადაწყვეტილების გამოტანას ველოდები - თუბა ჩაბუქი
დემირელის კოლეჯის ყოფილი მენეჯერის, მუსტაფა ემრე ჩაბუქის მეუღლემ, თუბა ჩაბუქმა იმედი გამოთქვა, რომ თბილისის საქალაქო სასამართლო დღეს სამართლიან გადაწყვეტილებას მიიღებს. დღეს სასამართლო განიხილავს ჩაბუქის თურქეთში ექსტრადირების საკითხს.
თუბა ჩაბუქმა არ გამორიცხა, რომ საჭიროების შემთხვევაში მიმართოს სტრასბურგის სასამართლოს.
„დღეს მე არა პოლიტიკური, არამედ სამართლებრივი გადაწყვეტილების გამოტანას ველოდები და ამაში მე დარწმუნებული ვარ. რა თქმა უნდა, წინააღმდეგ შემთხვევაში გამოვიყენებთ ჩვენს უფლებებს ბოლომდე და გავასაჩივრებთ უზენაეს სასამართლოში და თუ საჭირო იქნება ევროსასამართლოში“, -უთხრა თუბა ჩაბუქმა ჟურნალისტებს.
ჩაბუქის ადვოკატის, სოსო ბარათაშვილის მტკიცებით, დემირელის კოლეჯის ყოფილ მენეჯერს საქმე პოლიტიკურად მოტივირებულია.
„ვაპირებთ, სასამართლოს წარვუდგინოთ ვრცელი წერილობითი მოსაზრება, თანდართულ მტკიცებულებებთან ერთად და დავასაბუთოთ ჩაბუქის თურქეთში დაუშვებლობა და განვუმარტოთ სასამართლოს მრავალრიცხოვან მტკიცებულებებზე დაყრდნობით (მათ შორის ევროკავშირის, ევროსაბჭოს, გაეროს სპეციალური მომხსენებლის, „ჰუმან რაით ვოჩის“, „ემნესთი ინთერნეიშალის“, საქართველოს სახალხო დამცველის რეკომენდაციის, არასამთავრობო ორგანიზაციათა გამოკვლევების საფუძველზე), რომ ჩაბუქს მოელის წამება და არაადამიანური მოპყრობა. თურქეთის რესპუბლიკაში შეუძლებელია განხორციელდეს სამართლიანი სასამართლო პროცესი, ეს საქმე ატარებს პოლიტიკურ ხასიათს. იმ შემთხვევაში, თუ სასამართლო გაიზიარებს პროკურატურის პოზიციას, 7 დღის ვადაში გავასაჩივრებთ უზენაეს სასამართლოში და პარალელურად ვაპირებთ მივმართოთ ადამიანის უფლებათა ევროპულ სასამართლოს, რათა გამოყენებული იყოს ევროპული სასამართლოს რეგლამენტის 39-ე წესი და შეჩერებული იყოს საკითხის არსებით განხილვამდე მუსტაფა ემრე ჩაბუქის თურქეთში ექსტრადიცია", - განაცხადა ბარათაშვილმა.
თურქეთის მოქალაქე მუსტაფა ემრე ჩაბუქი 24 მაისს დააკავეს თურქეთის მხარის მოთხოვნით, რომელიც ამტკიცებს, რომ ჩაბუქი ტერორისტული ორგანიზაციის საქმიანობაში იყო ჩართული. დაკავებულსა და მის ოჯახს საქართველოს დევნილთა სამინისტრომ ლტოლვილთა სტატუსსზე უარი უთხრა.
დემირელის კოლეჯის ყოფილ მენეჯერს წინსაექსტრადაციო პატიმრობის დრო საქართველოს საპატიმროში 24 თებერვალს უმთავრდება.