პოლიტიკა

მუსტაფა ემრე ჩაბუქის საქმის შესწავლას დავიწყებთ - სოზარ სუბარი

საქართველოს ლტოლვილთა და განსახლების მინისტრის, სოზარ სუბარის განცხადებით, უწყება აპირებს, განიხილოს დემირელის კოლეჯის მენეჯერის, მუსტაფა ემრე ჩაბუქის მოთხოვნა, მისთვის და მისი ოჯახისთვის პოლიტიკური თავშესაფრის მინიჭების შესახებ.

სუბარმა განმარტა, რომ ლტოლვილის სტატუსის მისაღებად ჩაბუქის მოთხოვნა უნდა შეესაბამებოდეს საერთაშორისო კონვენციასა და საქართველოს კანონმდებლობას.

„მუსტაფა ემრე ჩაბუქის მასალები არის შემოტანილი ჩვენთან, ჩვენ დავიწყებთ შესწავლას. შესწავლა გულისხმობს შემდეგს - რამდენად შეესაბამება მის მიერ ლტოლვილის სტატუსის მოთხოვნა საერთაშორისო კონვენციას, საერთაშორისო სტანდარტებსა და საქართველოს კანონმდებლობას და ამის მიხედვით იქნება მიღებული გადაწყვეტილება. ამისთვის საჭირო იქნება, მან და მისმა ადვოკატებმა წარმოადგინონ ის საბუთები, რომლებიც ცხადყოფს, რამდენად ჯდება კონვენციის მფარველობის ქვეშ მისი საქმე“, - განაცხადა სუბარმა.

რაც შეეხება თურქეთის მოთხოვნას ჩაბუქის მისთვის გადაცემის შესახებ, სუბარმა განმარტა, რომ ექსტრადირების პროცესი ავტომატურად, საქმის შესწავლის გარეშე არ ხორციელდება.

შეგახსენებთ, მუსტაფა ემრე ჩაბუქის მეუღლის, თუფა ჩაბუქის განცხადებით, მან უკვე შეიტანა თხოვნა ლტოლვილთა და განსახლების სამინისტროში პოლიტიკური თავშესაფრის მინიჭების თაობაზე.

დემირელის კოლეჯის მენეჯერი მუსტაფა ემრე ჩაბუქი თურქეთის მოთხოვნით 24 მაისს დააკავეს. თურქული მხარე მას ფეთჰულა გიულენის ტერორისტულ ორგანიზაციასთან თანამშრომლობაში ადანაშაულებს. თბილისის საქალაქო სასამართლომ ჩაბუქს 3-თვიანი წინასაექსტრადაციო პატიმრობა შეუფარდა.

ანა მებურიშვილი