საზოგადოება

ნარკოპოლიტიკასთან დაკავშირებით საგაზაფხულო სესიაზე შევიტანთ საკანონმდებლო ცვლილებების პაკეტს - აკაკი ზოიძე

არ შეიძლება ნარკოდამოკიდებული ადამიანი ციხეში იჯდეს , - განუცხადა ჟურნალისტებს პარლამენტის ჯანდაცვის კომიტეტის თავმჯდომარემ, აკაკი ზოიძემ აღნიშნულ თემასთან დაკავშირებით არასამთავრობო ორგანიზაციებისა და პოლიტიკური პარტიების წარმომადგენლებთან შეხვედრის დაწყებამდე.

როგორც უმრავლესობის წევრმა აღნიშნა, ნარკოტიკული საშუალებების დეკრიმინალიზაციასთან დაკავშირებით მისი პოზიცია ურყევია.

აკაკი ზოიძის განცხადებით, ჯერჯერობით უმრავლესობაში საერთო პოზიცია არ არის და ამ მიმართულებით მიმდინარეობს მუშაობა.

”ციხეში არ უნდა იჯდეს ნარკოდამოკიდებული ადამიანი, ასე ვფიქრობ, როგორც საზოგადოებრივი ჯანდაცვის, ასევე ადამიანის უფლებათა დაცვის კუთხიდან გამომდინარე. ეს არის ჩემი მყარი პოზიცია. უმრავლესობაში გვაქვს დისკუსიები, მიმდინარეობს შეჯერება. ჩვენ გაცხადებული გვაქვს, რომ უნდა მოხდეს ნარკოპოლიტიკის ლიბერალიზაცია. ეს იყო წინასაარჩევნო პროგრამაში. თუ რა ფორმით მოხდება ლიბერალიზაცია, სწორედ ამ თემებზე ვმუშაობთ. ნარკოპოლიტიკასთან დაკავშირებით საგაზაფხულო სესიაზე შევიტანთ საკანონმდებლო ცვლილებების პაკეტს. პარლამენტი მხარს დაუჭერს თუ არ დაუჭერს, ეს სხვა თემაა”, - განაცხადა აკაკი ზოიძემ.

ნინო ექვთიმიშვილი