საზოგადოება

ნარკოპოლიტიკის დეკრიმინალიზაცია ნიშნავს ახალ ნარკომანებს, ახალ დანგრეულ ოჯახებსა და ახალ მსხვერპლს - ისკო დასენი

„ჩემი პოზიცია ასეთია, ერთი ხელის მოსმით ამ კანონის მიღება არ შეიძლება“, - ასეთი შეფასება მისცა საპარლამენტო უმრავლესობის წევრმა ისკო დასენმა ნარკოპოლიტიკის ეროვნული პლატფორმის მიერ შეთავაზებული ნარკოპოლიტიკის დეკრიმინალიზაციის რეფორმას.

როგორც მან ტვ პირველის გადაცემა „პოლიტმეტრში“ განაცხადა, ნარკოპოლიტიკის დეკრიმინალიზაცია ნარკომომხმარებელთა რაოდენობას მკვეთრად გაზრდის. დასენის თქმით, ეს შეხედულება უფრო გაამყარა პორტუგალიის მაგალითმა.

„პირადად შევხდი პორტუგალიის პარლამენტის წევრს, რომელიც ჩვენთან პარლამენტში იმყოფება, დავუსვით ჩვენ მას კითხვები. კანონი ისე მიიღეს, რომ არანაირი გამოკითხვა არ ჩატარებულა. ბოლოს ვკითხეთ, რა მოხდა ამ კანონის მიღების შემდეგ. აღმოჩნდა, რომ თავიდან მკვეთრად გაიზარდა ნარკომანების რაოდენობა. ეს ხდებოდა რამდენიმე წლის განმავლობაში. ეს რას ნიშნავს ჩვენს შემთხვევაში? ეს ნიშნავს ახალ ნარკომანებს, ახალ დანგრეულ ოჯახებს, ახალ მსხვერპლსა და ა.შ. ჩვენ თვალწინ გაიარა 90-იანმა წლებმა, მშვენივრად ვიცით, რომ პატარა 12-13 წლის გოგოები დავკარგეთ ამ ნარკომანიის შედეგად“, - თქვა პარლამენტარმა.

დასენმა აღნიშნა, რომ ამ რეფორმის გასატარებლად მოსახლეობის სურვილია საჭირო.

„მე მაშინვე ვიქნები თანახმა, თუ მოსახლეობის 50% მაინც იტყვის, რომ ეს კანონი მისაღებია“, - განაცხადა დასენმა.

აღნიშნული კანონპროექტის ინიცირება უკვე მოხდა საკანონმდებლო ორგანოში, ხოლო მისი საპარლამენტო განხილვები მომავალი კვირიდან იგეგმება.

გუშინ უცხოელმა ექსპერტებმა ქართველ კანონმდებლებს ნარკოპოლიტიკის რეფორმის მიმართულებით საკუთარი გამოცდილება გაუზიარეს. შეხვედრა პარლამენტის ჯანმრთელობის დაცვისა და სოციალურ საკითხთა კომიტეტის ორგანიზებით გაიმართა.