საზოგადოება

ნარკოპოლიტიკის დეკრიმინალიზაციის რამდენიმე საკითხზე სხვადასხვა უწყებას საწინააღმდეგო პოზიცია აქვს - ეკა ბესელია

პარლამენტის იურიდიულ საკითხთა კომიტეტის თავმჯდომარის, ეკა ბესელიას თქმით, ნარკოპოლიტიკის რეფორმასთან დაკავშირებით სხვადასხვა სახელმწიფო უწყება ვერ თანხმდება. კერძოდ, აზრთა სხვადასხვაობა არსებობს რეფორმის ისეთ საკითხებზე, როგორებიცაა ყველა ნარკოტიკის დეკრიმინალიზაცია, ოდენობები, რეალიზაციასთან დაკავშირებული დეფინიციის ცვლილება და საზღვრაზე შემოტანის სამართლებრივი მოგვარება.

„მე ამ პროცესს ვუყურებ ძალიან კომპლექსურად. ეს არ არის რეფორმა, რომელსაც მხოლოდ საკანონმდებლო ცვლილება ეყოფა. ეს არის რეფორმა, რომელსაც სჭირდება ძალიან კომპლექსური გააზრება, ერთი მხრივ, საკანონმდებლო, მეორე მხრივ, საგანმანათლებლო, სოციალური და სხვა რესურსების მომზადებით, ფინანსური რესურსების მობილიზებით და რა თქმა უნდა, ყველა უწყების ჩართვით, რომ რეფორმის მიზანი რაც არის, იყოს მიღწეული.

მიზანი არის ის, რომ ქვეყანაში გვყავდეს რაც შეიძლება ცოტა და იდეალურ შემთხვევაში, არცერთი ნარკომანიით დაავადებული ადამიანი და შევამციროთ ზიანი საზოგადოებაზე, შევამციროთ ამ ადამიანების რიცხვი იმით, რომ ვუმკურნალოთ მათ. ჩვენ საკანონმდებლო განხილვებს ვამზადებთ, სამუშაო პროცესი დაწყებულია, მაგრამ საჭიროა კომპლექსური ჩართვა ყველა უწყების. არის რამდენიმე საკითხი, რომლებზეც უწყებებს აქვთ საწინააღმდეგო პოზიცია. ეს ეხება ოდენობებს, ყველა ნარკოტიკის დეკრიმინალიზაციის საკითხს, რეალიზაციასთან დაკავშირებული დეფინიციის ცვლილებას და საზღვარზე შემოტანის საკითხების სამართლებრივ რეგულირებას. აქ იქნება საჭირო გარკვეული კომპრომისების ძიება, რომ პოზიციები დაახლოვდეს“, -თქვა ბესელიამ.

შეგახსენებთ, ნარკოპოლიტიკის ეროვნულმა პლატფორმამ შეიმუშავა კანონპროექტი ნარკოპოლიტიკის დეკრიმინალიზაციის შესახებ. მისი ინიცირება უკვე მოხდა საკანონმდებლო ორგანოში, ხოლო რეფორმის საპარლამენტო განხილვები მომავალი კვირიდან იგეგმება.

ანა მებურიშვილი