რეგიონები

ნატო ჩხეიძე ამომრჩეველთან კარდაკარ შეხვედრებს განაგრძობს

ხაშურში, ქარელსა და გორის სოფლებში „ძალა ერთობაშია“-ს მაჟორიტარი დეპუტატობის კანდიდატი ნატო ჩხეიძე მოსახლეობასთან შეხვედრებს განაგრძობს. პარლამენტარმა დღეს შინდისში კარდაკარ მოიარა ოჯახები და მათ პრობლემებს გაეცნო.

ნატო ჩხეიძე სოციალურ ქსელში წერს:

„ დღე მეცამეტე: შინდისი

დიდი სოფელია შინდისი, ამილახვრიანთ გალავანთან გადაუხვევ და ყელქცეულის გზას დაადგები. ეს გზა ზეპირად ვიცი, თვალდახუჭული ვივლი.

ახლა მხარდამჭერებთან ერთად დავდივარ, შარა - შარა და შუკა-შუკა.

ყველგან პომიდვრით სავსე ყუთებია, სურნელოვანი და გემრიელი, თანაბრად და კოხტად აწყვია, აწყვია და აწყვია, ეზოებშიც და გზებზეც, აწყვია პომიდვრით სავსე ყუთები.

“ მოვიწევთ, დავკრეფთ და გვილპებაო”- ჩივის ხალხი,- “ ყუთს 5 ლარს ვადებთ და მყიდველი არ არისო, პორუტყვსღა ვაჭმევთო, იმათაც ალერგია აქვთ დამართული ამდენი პომიდვრითო, წითელი ფერის დანახვა აღარ უნდათ ხარებივითაო”,

ჩემი ბავშვობის დიდი სოფელი ლამის დაცლილია, სახლები მიტოვებული, ახალგაზრდობა ცოტაღაა, ვინც არის, სანუგეშოს ვერაფერს ხედავს და იმედი ამ უმძიმესი ყოფის შეცვლისა მხოლოდ არჩევნებიაო, ამბობენ.

ასაკოვნები დაკოჟროლ თითებზე ითვლიან დღეებს 31 ოქტომბრამდე და : “ შენთანა ვართ, შენთანა, მაგრამ, იცოდე, ჩვენი ხმები დაიცავითო” - ისე დაქადნებით მეუბნებიან, თითქოს ერთნი არ ვიყოთ ამ სურვილში.

სხვა სურვილებშიც ერთნი ვართ.

შინდისი, ჩვენი გმირების სოფელი, სამშობლოსათვის დაღუპულთა ხსოვნითა და თავდადებით აგრძელებს ცხოვრებას და ღირსეულ მომავალს ელის.“ - დაწერა ნატო ჩხეიძემ.

მაჟორიტარობის კანდიდატი ნატო ჩხეიძე, მოსახლეობას, გამარჯვების შემთხვევაში, პრობლემების მოგვარებასა და სოციალური მდგომარეობის გაუმჯობესებას დაპირდა.