კომენტარი

ნატო ჩხეიძე: ჩანს, რაღაც სერიოზული გამორჩა ოცნების მმართველს...

პარლამენტის დამოუკიდებელი დეპუტატი ნატო ჩხეიძე საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის დავით სერგეენკოს შესაძლო გადაყენებას ეხმაურება.

„სერიიდან: ის, რაც ხდება

დავით სერგეენკო იყო, არის და იქნება ჩვენი გუნდის წარმატებული წევრიო - ბრძანა პრემიერმა ბახტაძემ.
გუნდის წევრიო... და არა კაბინეტის მინისტრიო:)

ახალი სისხლია საჭიროო, იქვე დასძინა მინისტრთა მინისტრმა.

ბატონი სერგეენკოს სისხლის დაძველება მისი რეიტინგის უსაშველო ზრდის პირდაპირპროპორციული აღმოჩნდა.

ასეა, როცა მავანის რეიტინგი დაუგეგმავად იზრდება, ჩანს, რაღაც სერიოზული გამორჩა ოცნების მმართველს..

ჰოდა, ზომებიც მიღებულია.“ - დაწერა ნატო ჩხეიძემ სოციალურ ქსელში.

შეგახსენებთ - დავით სერგეენკო საქართველოს შრომის, ჯანმრთელობისა და სოციალური დაცვის მინისტრის თანამდებობაზე 2012 წლის ოქტომბერში დაინიშნა.

ეროვნულ-დემოკრატიული ინსტიტუტის (NDI) მიერ 2019 წლის მაისში გამოქვეყნებული კვლევის თანახმად, დავით სერგეენკო პოლიტიკოსების რეიტინგში ლიდერობს. მის მიმართ დადებითი დამოკიდებულება გამოკითხულთა 40%-ს აქვს.