საზოგადოება
ნატო ჩხეიძე: გვარზე ხტომა ადვილია, სხვის ღირსებაზე და მით უფრო ქვეყნის ღირსებაზე გადახტომა ძნელია, ამიტომაც ვერ დაიძახებენ ივანიშვილები ჰოპლას
ივანიშვილისა და მისი ბიჭების ძალადობა და თავგასულობა ამ ორი წლის წინ ასეთივე ჩანაწერებით იხილ-ისმინა მთელმა ქვეყანამ, - ამის შესახებ მოძრაობა „სახელმწიფო ხალხისთვის“ ლიდერი ნატო ჩხეიძე სოციალურ ქსელში წერს.
„სერიიდან: არარაობა...
ივანიშვილისა და მისი ბიჭების ძალადობა და თავგასულობა ამ ორი წლის წინ ასეთივე ჩანაწერებით იხილ-ისმინა მთელმა ქვეყანამ და ისეთი მოულოდნელი იყო მსმენელისთვის რეკეტიორებად და ბანდიტებად მათი მოხსენიება ზაზა ოქუაშვილის მიერ, რომ გაოგნებას ვერ ფარავდნენ, თუმც დაიჯერეს და დაიჯერეს სწორედ იმიტომ , რომ აშკარა გახდა ივანიშვილის ილუზიონისტობა ვითომ გულუხვობისა და გულისხმიერების ფასადით.
ამიტომაც აღარ ენდო მოსახლეობა ბიძინა ივანიშვილს და გვახსოვს მისი ჩამოხეული სახე საპრეზიდენტო არჩევნების პირველი ტურის შემდეგ.
მას მერე ბევრი რამ ამოვიდა დღის სინათლეზე, გამომჟღავნდა ივანიშვილისგან წახალისებული ბიჭების თავაშვებულობა და უსაზღვრო კორუფცია თავიანთთვის და... ბიძინასთვის.
უამრავი, ლამის ყოველდღე სულ ახალ-ახალი ფაქტები გვცვიოდა თვალ-ყურ-სახეში ეკრანებიდან და აღარაფერი გვიკვირდა მათი ნამოქმედარი, საზიანოდ ნამოქმედარი, უაღრესად საზიანოდ მთელი ქვეყნისათვის.
და ახლა რაც ვიხილეთ, - ბერა, ირაკლი, ანზორი... იმ ძველი ამბების გაგრძელებაა, იმ ძველის და ამ ახლების, გუშინწინდელის, გუშინდელის...იმ და ამ საზიზღარი და სამარცხვინო ამბების ლოგიკური გაგრძელება.
გასაოცარი სწორედ, - სხვას რას ელოდით, ადამიანებო, ბიძინას შვილისგან?
კვიცი გვარზე ხტისო.
ესაა და ეს.
ოღონდ ისიცაა, რომ ჯერ გადახტი და ჰოპლა მერე დაიძახეო.
გვარზე ხტომა ადვილია, სხვის ღირსებაზე და მით უფრო ქვეყნის ღირსებაზე გადახტომა ძნელია, ძალიან ძნელი, უფრო სწორად შეუძლებელი.
ამიტომაც ვერ დაიძახებენ ივანიშვილები ჰოპლას.
ვერა, ჰოპლას ვერ დაიძახებენ,“-დაწერა ნატო ჩხეიძემ.