უახლესი ამბები
არქივი
პოლიტიკა
ნატო ჩხეიძე: ტრაგედიის დღე ტრაგედიის წუთად იქცა
„ჩვენი ხელისუფლება ან ტრაგედიებს ძალიან შეეჩვია და აღარაფერად უღირთ, ანდა ძირფესვიანად განასხვავებენ თბილისსა და ბაღდათს“,- ამის შესახებ პარლამენტის დამოუკიდებელი დეპუტატი ნატო ჩხეიძე სოციალურ ქსელში წერს.
„სერიიდან: ტრაგედიის დღე და წუთი
შარშან, თბილისში ოჯახი დაიღუპა და მაშინდელმა პრემიერმა ქვეყანაში გლოვის დღე გამოაცხადა.
წელს, ბაღდათში ოჯახი დაიღუპა და პარლამენტის თავჯდომარემ სესიაზე წუთიერი დუმილი გამოაცხადა.
ტრაგედიის დღე ტრაგედიის წუთად იქცა.
ჩვენი ხელისუფლება ან ტრაგედიებს ძალიან შეეჩვია და აღარაფერად უღირთ, ანდა ძირფესვიანად განასხვავებენ თბილისსა და ბაღდათს.
ან?..“ - აცხადებს ნატო ჩხეიძე.
მისივე თქმით, „ტრაგედიასაც თავის სასარგებლოდ იყენებს ეს ჩვენი “ოცნება”.
„დღესო, პოლიტიკური განცხადებები არ გავაკეთოთო, ასე გაიზიარეს ბაღდათში მომხდარი ტრაგედია და ასე “მარჯვედ” აირიდეს ოპოზიციისაგან მოსალოდნელი შენიშვნები.
აფერუმ მათ “გამჭრიახობას”!..“ -ამბობს ნატო ჩხეიძე.
ცნობისთვის, საპარლამენტო უმრავლესობის ლიდერმა, მამუკა მდინარაძემ სხდომაზე განაცხადა, რომ მომხდარი უბედური შემთხვევის გამო, უმრავლესობაში კონსულტაციების შედეგად გადაწყდა, რომ დღეს უმრავლესობის დეპუტატები სხდომაზე პოლიტიკურ განცხადებებს არ გააკეთებენ.
პარლამენტთან გამართულ ბრიფინგზე გიგი უგულავამ საქართველოს პარლამენტს მოუწოდა, ბაღდათში მომხდარი ტრაგედიის გამო, დღევანდელი სესია გადაედო.
ბაღდათში, საცხოვრებელ სახლში ხანძარი გუშინ გაჩნდა. მომხდარს ექვსი ადამიანი, მათ შორის ოთხი ბავშვი ემსხვერპლა.