საზოგადოება

ნატო ჩხეიძე: ვინ რა მიიღო და რაში მიიღო ამ დაჯილდოებისას, რომ გითხრათ, ბევრი მოსაყოლიც არაფერია

პარლამენტის დამოუკიდებელი დეპუტატი ნატო ჩხეიძე ლიტერატურული პრემია “ საბას” დაჯილდოებას სოციალურ ქსელში ეხმაურება.

„სერიიდან: არც ვიცი, მაგრამ გილოცავთ

2-3 დღის წინ კონსერვატორიის დიდ საკონცერტო დარბაზში ლიტერატურული პრემია “ საბას” დაჯილდოება ვიხილეთ ტვ პირველის პირდაპირი ეთერით.

ღონისძიების დაწყებისა და დასრულებისას გია ყანჩელის მუსიკა შესრულდა.

მუსიკოს- შემსრულებელმა ასე მიულოცა დაჯილდოებულებს:

გილოცავთ ვინც რა მიიღეთ, კი არ ვიცი ვინ რა მიიღეთ, რადგან გასული ვიყავი, მაგრამ გილოცავთ და ახლა მე თქვენ შეგისრულებთ ჩვენი დიდი მაესტროს უკვდავ მუსიკას...

და არა უშავს რა , ისე შეასრულა, ხოლო ვინც რა მიიღო და რისთვის მიიღო იმ ხალხისგან დიდი ტაში დაიმსახურა.

ვინ რა მიიღო და რაში მიიღო ამ დაჯილდოებისას, რომ გითხრათ, ბევრი მოსაყოლიც არაფერია.

უღიმღამო და დუნე ღონისძიება.

მოკლე, მაღალფარდოვანი და ზერელე წარდგინებები და კიდევ უფრო ზედაპირული მადლობები.
გამონაკლისი მთარგმნელი ნანა ტონია იყო, რომლის სამადლობელი სიტყვა ისეთივე ნათელი და ღრმააზროვანი იყო, ვისაც თარგმნის და როგორც თარგმნის ( გადამედო მუსიკოსის სტილი:)), დანარჩენები, აბა რა გითხრათ, ერთს მაგალითად, როგორც ჩანს, “ ოსკარის” დაჯილდოებაზე ეგონა თავი და მადლობა მშობელ დედას გადაუხადა.

მე-17 “საბაზე” ლამის მე-15-დ დააჯილდოეს ერთი და იგივე პროზაიკოსი, დასაჯილდოებელი კრიტიკოსი მეორე წელია ვერ იპოვეს, ხოლო პოეზიის ნომინაციაში დასაჯილდოებელთა სიაში წელსაც ვერ მიაგნეს ეთერ თათარაიძეს...

შთამბეჭდავი სულ ეს იყო და კიდევ ის ფრაზა, თავშივე რომ მოგახსენეთ: გილოცავთ, ვინც რა მიიღეთ, კი არ ვიცი რა მიიღეთ, მაგრამ გილოცავთ.

ჰო, რომ არ გამომრჩეს, დასამახსივრებელი კიდევ ზაალ სამადაშვილის ნათქვამი იყო, “მწერლობა შრომაა, და არა მარტო შრომა, არამედ ბრძოლაც”.

ის შრომა და ის ბრძოლა, ასე რომ აკლია “ საბას” და სამწუხაროდ, არა მარტო მას ამ ჩვენს საწყალ ქვეყანაში.

ასეთი იყო ორიოდე დღის წინანდელი მე-17 “საბა”,

ანუ ისეთივე, როგორიც დანარჩენი 16.“ - დაწერა ნატო ჩხეიძემ.