პოლიტიკა
ნატოში გაწევრიანება საქართველოს, უკრაინისა და ალიანსის 29 წევრის გადასაწყვეტია - იენს სტოლტენბერგი
ნატოს გენერალური მდივნის, იენს სტოლტენბერგის თქმით, ჩრდილოატლანტიკური ალიანსი მხარს უჭერს საქართველოსა და უკრაინის მისწრაფებას ნატოში ინტეგრაციის კუთხით. როგორც სტოლტენბერგმა „დოიჩე ველეს“ რუსულ სამსახურთან ინტერვიუში განაცხადა, რუსეთს არ აქვს უფლება, ჩაერიოს ამ პროცესში.
„ჩვენ მხარს ვუჭერთ მათ [საქართველოსა და უკრაინას] მისწრაფებას ჩრდილოატლანტიკურ ალიანსში ინტეგრაციის კუთხით. ჩვენ ვთანამშრომლობთ საქართველოსთან და ვეხმარებით რეფორმების გატარებაში. ჩვენ ასევე მხარს ვუჭერთ უკრაინასაც.
ამ ორი ქვეყნის ნატოში გაწევრიანების საკითხს თვითონ ისინი გადაწყვეტენ ალიანსის 29 წევრთან ერთად. მათ გარდა არავის არ შეუძლია, ჩაერიოს ამ პროცესში ან ის დაბლოკოს. რუსეთს არ აქვს უფლება, გადაწყვიტოს, რა უნდა გააკეთონ მისმა მეზობლებმა“, - განაცხადა სტოლტენბერგმა.
სტოლტენბერგმა დასძინა, რომ „სრულიად მიუღებელია“, როცა რუსეთისნაირი სახელმწიფოები „ცდილობენ, აღადგინონ თავისი გავლენის სფეროები და გადაწყვიტონ, რა უნდა მოიმოქმედონ მისმა მეზობლებმა“.