პოლიტიკა

ნაციონალებმა კოდორის ხეობაში მხოლოდ 2 წლის განმავლობაში მილიარდ ორას მილიონ დოლარზე მეტი გაათეთრეს- ემზარ კვიციანი

პატრიოტთა ალიანსის წევრის პარლამენტარ ემზარ კვიციანის განცხადებით, ნაციონალური მოძრაობის წევრებმა კოდორის ხეობაში მხოლოდ 2 წლის განმავლობაში მილიარდ ორასი მილიონ დოლარზე მეტი გაათეთრეს.

როგორც კვიციანმა პრესკონფერენციაზე აღნიშნა, თემაზე მომუშავე ნდობის ჯგუფში მოხვედრის შემთხვევაში, იმ მასალებზე გრიფის მოხსნას მოითხოვს, რომელიც, მისივე განცხადებით, 2006-2008 წლებში კოდორის ხეობისთვის გადარიცხულ თანხებს უკავშირდება.

„მე მაინტერესებს, რა თანხები იყო კოდორის ხეობისთვის გათვლილი, როცა მე გუბერნატორი ვიყავი. მე მაქვს ინფორმაცია, რომ უამრავი ფული გაათეთრეს. ნდობის ჯგუფში ჩემი ყოფნის შემთხვევაში, მე სრული უფლება მექნება მოვითხოვო გრიფის მოხსნა და გავიგო, თუ რა ფულს ათეთრებდნენ ნაციონალები. მე ვიცი, რომ მილიარდ ორასი მილიონი დოლარზე მეტი მათ მხოლოდ 2 წლის განმავლობაში გაათეთრეს“, – განაცხადა ემზარ კვიციანმა.

მონიკა დავლიანიძე