პოლიტიკა
ნაციონალური მოძრაობა ფინანსთა და ეკონომიკის მინისტრებს პარლამენტში იბარებს
ნაციონალური მოძრაობა მთავრობის ეკონომიკურ გუნდს პარლამენტში უმცირესობის სხდომაზე იბარებს. ამასთან დაკავშირებით პარტიის ოფისში, განცხადება საპარლამენტო უმცირესობის ლიდერმა, დავით ბაქრაძემ გააკეთა.
მისი თქმით, პარტიამ მომავალ ოთხშაბათს უმცირესობის სხდომაზე ფინანსთა და ეკონომიკის მინისტრები დაიბარა, რათა ლარის გაუფასურებასთან დაკავშირებით საზოგადოებას საკუთარი ხედვის შესახებ ინფორმაცია მიაწოდონ.
უმცირესობის ლიდერი ამბოსბ, რომ სხდომას ღია დებატების სახე ექნება.
როგორც ბაქრაძემ აღნიშნა, ლარის გაუფასურება 2 კონკრეტულ საფრთხეს ქმნის. მისი განცხადებით, თუ ლარის კურსი კიდევ უფრო გაუფასურდება, მთავრობა იძულებული იქნება ენერგოტარიფებს გადახედოს და გააძვიროს.
ბაქრაძის განცხადებითვე, თუ ლარის კურსთან დაკავშირებით გაურკვევლობა შენარჩუნდება, ეს საქართველოს ეკონომიკურ განვითარებაზე უარყოფითად იმოქმედებს. მისი თქმით, ასეთ ვითარებაში ვერცერთი ბიზნესმენი ვერ დაგეგმავს საკუთარ ბიზნეს საქართველოში, თუ მას არ ეცოდინება, როგორი იქნება ლარის და დოლარის თანაფარდობა მომავალ წელს.
,,ლარის გაუფასურება და ის გარკვევლობა, რომელიც არსებობს მომავალ კურსთან დაკავშირებით ქმნის პირდაპირ საფრთხეს ცხოვრების მორიგი გაძვირების ტალღის დაწყების და საქართველოში ეკონომიკური განვითარების კიდევ უფრო შეფეხების. ამ ფონზე სრულიად საგანგაშოა ის, რომ მთავრობისგან, მთავრობის ეკონომიკური გუნდისგან არაფერი არ გვესმის გარდა უსუსური თავის მართლების, რომ თურმე მთელ მსოფლიოში ყველა ვალუტა უფასურდება. აუცილებელია, ხელისუფლებამ მიაწოდოს მოსახლეობას ინფორმაცია, რა ნაბიჯების გადადგმას აპირებს ლარის გასამყარებლად, როგორ აპირებს მოსახლეობის დაცვას გაძვირების მორიგი ტალღისგან და რაც მთავარია, რა პროგნოზს აკეთებს მომავალ თვეებში ლარის კურსთან დაკავშირებით, რომ ადამიანებს, ვისაც აქვთ საბანკო კრედიტი, ჰქონდეთ საშუალება გათვალონ მათი ხელფასის რა ნაწილი წავა კრედიტის მომსახურებაზე, რომ ადამიანებს, ვისაც აქვთ ბიზნესი, გათვალონ უღირთ თუ არ უღირთ ამ ბიზნესის წარმოება და როგორი უნდა იყოს მათთვის ფასები და რომ ყველაზე გაჭირვებულ ფენას - სოციალურად დაუცველებს, პენსიონერებს ჰქონდეთ საშუალება გათვალონ, რამდენ მედიკამენტზე და პროდუქტეზე ეყოფათ პენსია და როგორ გაიტანონ თავი თვიდან თვემდე’’, - განაცხადა დავით ბაქრაძემ.
ნინო ექვთიმიშვილი