პოლიტიკა

ნაციონალური მოძრაობა „ომეგასა“ და „იბერიას“ დასაცავად რომ გამოვა, კომიკური სურათი იქნება - ეკა ბესელია

„ნაციონალური მოძრაობა „ომეგასა“ და „იბერიას“ დასაცავად რომ გამოვა, კომიკური სურათი იქნება, რადგან ზუსტად მათგან იყო რეპრესირებული ეს და ათასი სხვა კომპანია“,– ამის შესახებ ტელეკომპანია „პირველის“ გადაცემაში „რეაქცია“ საპარლამენტო უმრავლესობის წევრმა ეკა ბესელიამ განაცხადა.

მისი თქმით, ზაალ უდუმაშვილმა თემურ ჩარკვიანი მოიკითხოს.

„ამ ცნობილმა ბიზნესმენმა, რომლის გაკეთებულ სიღნაღსა და ბათუმს ჭრიდა ლენტებით სააკაშვილი, თავი ჩამოიხრჩო და წერილი დაწერა, რომ ეს ადეიშვილისა და მისი მეგობრების გამო გააკეთა. ისეთ დღეში ჩააგდეს, რომ სიცოცხლე საკუთარი ხელით მოისწრაფა. დიდი სია მაქვს, თუ უნდა, გავუგზავნი“, – განაცხადა ბესელიამ.

„ნაციონალური მოძრაობის“ ერთ-ერთმა ლიდერმა ზაალ უდუმაშვილმა განაცხადა, რომ ნამდვილად არ სმენია, რომ „ნაციონალური მოძრაობა“ კონკრეტულ ბიზნესს წილში ჩაჯდომოდეს.