საზოგადოება

ნებისმიერს უფლებას აქვს მოვიდეს აქციაზე და გამოხატოს თავის პროტესტი - ვაჟა სირაძე

საპოლიციო ძალებმა გაწმინდეს მხოლოდ ის ტერიტორია, სადაც უკანონოდ იყო ბლოკირებული შესასვლელები. რუსთაველზე გრძელდება აქცია კანონის ფარგლებში, - ამის შესახებ საპატრულო პოლიციის დეპარტამენტის ხელმძღვანელმა, ვაჟა სირაძემ განაცხადა.

„პარლამენტის შენობის მიმდებარე ტერიტორიაზე იყო ბლოკირებული ცენტრალური შესასვლელები. შსს-ს წარმომადგენლების მხრიდან მოხდა აქციის მონაწილეების არაერთხელ გაფრთხილება, რომ მათი ქმედება პარლამენტის შენობის ბლოკირება, არის უკანონობა.

შევედით მათთან კომუნიკაციაში, გავაფრთხილეთ და ვაცნობეთ, რომ ეს იყო უკანონო ქმედება. ისინი არ დაემორჩილენ პოლიციელის კანონიერ მოთხოვნას და შესაბამისად, გამოყენებული იქნა პოლიციური ძალები, რომლებმაც მოახდინეს პარლამენტის შენობაში შესასვლელების გახსნა. ის პირები, ვინც არ დაემორჩილა პოლიციის კანონიერ მოთხოვნას და გაუწია წინააღმდეგობა, დაკავებულ იქნა ადმინისტრაციულ სამართალდარღვევათა კოდექსის 173-ე და 166-ე მუხლებით. ბოლო ინფორმაციით, 18 პირი იყო დაკავებული და კიდევ დაემატა რამოდენიმე პირი.

საპოლიციო ძალებმა გაწმინდეს მხოლოდ ის ტერიტორია, სადაც უკანონოდ იყო ბლოკირებული შესასვლელები. რუსთაველზე გრძელდება აქცია კანონის ფარგლებში. რუსთაველის გამზირზე იყო კარვები და დაკეტილი იყო სავალი გზა, რაც შეკრებისა და მანიფესტაციის კანონის მე-11 მუხლს ეწინააღმდეგებოდა, კერძოდ, აქ არსებული ხალხის რაოდენობა არ იყო ისეთი, რომ დაეკეტათ რუთაველის მთლიანი გამზირი.

კომუნიკაცია გვქონდა აქციის ორგანიზატორებთან კიდევ ერთხელ განვუმარტეთ, რომ აქვთ უფლება გამოხატონ თავიანთი პროტესტი მშვიდ ვითარებაში, კანონის სრული დაცვით“, - განაცხადა სირაძემ.

მისივე თქმით, სიმართლეს არ შეესაბამება ინფორმაცია, რომ პოლიცია ვინმეს აქციაზე საკვების და წყლის შეტანას უკრძალავს.

„ნებისმიერს უფლებას აქვს მოვიდეს აქციაზე და გამოხატოს თავის პროტესტი. გზა გახსნილია, მოძრაობა აღდგენილია“, - აღნიშნა სირაძემ.