პოლიტიკა
ნიკა გვარამია დაკითხვაზე დაიბარეს
რუსთავი 2-ის გენერალური დირექტორი ნიკა გვარამია დაკითხვაზე დაიბარეს. ის ხვალ 15 საათზე მოდულის შენობაში უნდა მივიდეს. ამის შესახებ გვარამიამ ფეისბუკის საკუთარ გვერდზე დაწერა.
საქმე ეხება ნიკა გვარამიასა და მიხეილ სააკაშვილის სატელეფონო საუბრის ფარულ ჩანაწერს.
„ოჯახთან ერთად რაჭიდან ბათუმის გზას ის-ის იყო, უნდა დავდგომოდი, მოდულში დამიბარეს 2015 წლის სახელმწიფო გადატრიალების საქმეზე დასაკითხად (ჩემი და სააკაშვილის ფარული ჩანაწერი).
ხვალ, სამზე, მოდულში.
ps ყოველი არჩევნების წინ ჩემი აქტუალიზაცია რომ ხდება, ტყუილია. ეგრევე ყველაზე მოთხოვნადი ვხდები, ყველა კანდიდატს რომ შეშურდება.
pps. გამორიცხულია, მე ქალაქიდან გავიდე, გინდა საქმეზე, გინდა დასასვენებლად და ან გამომძიებელმა არ დარეკოს, ან „რუსთავი 2“-ს არ შეუტიონ. ბუნებაში არ მომხდარა ბოლო სამი წელია. კიდე სამი დღე მაცადეს დასვენება, გასაკვირია“, - დაწერა გვარამიამ სოციალურ ქსელში.
შეგახსენებთ, 2015 წლის 29 ოქტომბერს ერთ-ერთ უკრაინულ საიტზე გავრცელდა სატელეფონო საუბრის ფარული ჩანაწერი, რომელშიც საქართველოს ყოფილი პრეზიდენტი და ოდესის ექს-გუბერნატორი მიხეილ სააკაშვილი ესაუბრებოდა გიგა ბოკერიას და ნიკა გვარამიას რუსთავი 2-ის საქმეზე. საუბარი ეხებოდა „რუსთავი 2“-ის დაცვას, მათ შორის, ბარიკადების მოწყობითა და „ბოევიკების“ ჩართვით.
ანა მებურიშვილი