საზოგადოება
ნიკა გვარამია ქიბარ ხალვაშს სთავაზობს, რუსთავი 2 მის კოლექტივს მიჰყიდოს
რუსთავი 2-ის გენერალური დირექტორი ნიკა გვარამია ქიბარ ხალვაშს სთავაზობს, ტელეკომპანია მის კოლექტივს მიჰყიდოს.
შესაბამისი განცხადება ნიკა გვარამიამ არხის თანამშრომლებთან ერთად გამართულ სპეციალურ ბრიფინგზე გააკეთა.
„მიუხედავად იმისა, რომ ჩვენ არ ვაღიარებთ უკანონო გადაწყვეტილებას და მივიჩნევთ მას პოლიტიკურ და არასამართლებრივ გადაწყვეტილებად, ფორმალურად, ის არის მაინც ძალაში. ჩვენ გვქონდა კონსულტაციები მესაკუთრეებთან, რომლებიც ნამდვილად კანონიერი მესაკუთრეები არიან, მიუხედავად იმისა, რას იტყვის 9 სულგაყიდული მოსამართლე, მათ ექნებათ საერთაშორისო სასამართლო დავები ქიბარ ხალვაშთან. ამ ყველაფრის მიუხედავად, ჩვენ ვაკეთებთ შემდეგ განცხადებას - რაკიღა ოფიციალურად დეკლარირებულია, რომ რუსთავი2-ის სარედაქციო პოლიტიკის შენარჩუნება არის მნიშვნელოვანი, რაკიღა ტვ პირველის ეთერში და მადლობა ამ კომპანიას, ქიბარ ხალვაშმა გააკეთა განცხადება, რომ მისთვის ეს არის ბიზნესის საკითხი და ის აპირებს რუსთავი2-ის გაყიდვას, ვაკეთებთ შემდეგ შეთავაზებას, ჩემს უკან დგანან ადამიანები, ვის მხარზეც დგას დღეს რუსთავი2. ესენი არიან ადამიანები, ვის გამოც რუსთავი2 არის ისეთი, როგორიც არის და მე კი არა, გადაეცით რუსთავი 2 მის კოლექტივს. თუ არ იტყუებით, თუ არ ცრუობთ და, თუ არ გინდათ ქვეყანაში ერთხმად აჟღერებული ტელევიზია, გადაეცით ტელევიზია ამ კოლექტივს,“ - განაცხადა ნიკა გვარამიამ.
რუსთავი2-ის გენერალური დირექტორი ქიბარ ხალვაშს სთავაზობს, რომ მისი კომერციული ინტერესის დასაკმაყოფილებლად, დარჩენილ თანხას, რომელსაც ის ითხოვდა, 3 მილიონ 944 ათას 397 დოლარს , გადაუხდიან.
მისი თქმით, რუსთავი2 პირდაპირ ეთერში მაუწყებლობას განაგრძობს და ეს ტელეკომპანიის ბოლო სიტყვაა.
ნინო ექვთიმიშვილი