საზოგადოება

ნიკა გვარამიასთან დაკავშირებით ხელისუფლებამ უფრო საფუძვლიანი მტკიცებულებები უნდა დადოს - გიგლა ბარამიძე

„დემოკრატიული მოძრაობის“ გენერალური მდივნის, გიგლა ბარამიძის განცხადებით, პროკურატურამ „რუსთავი 2“-ის გენერალური დირექტორის, ნიკა გვარამიას წინააღმდეგ უფრო საფუძვლიანი არგუმენტები უნდა დადოს.

„უკვე ერთი წელია გვესმის საგა „ბატონი ნიკა გვარამია და ფარული ჩანაწერები“. თუ რამე ანტისახელმწიფოებრივი და კანონსაწინააღმდეგო აქვს ხელისუფლებას, მაშინ დადოს და ნიკა გვარამიაც დაასვენოს და სხვებიც, ხოლო პასუხი მოსთხოვონ იმას, ვისაც საჭიროა“, - განაცხადა ბარამიძემ დღევანდელ პრესკონფერენციაზე.

ბარამიძის თქმით, ის და დემოკრატიული მოძრაობა მხარს უჭერენ „რუსთავი 2“-ს.

„ჩვენ ყოველთვის ვუჭერდით მხარს თავისუფალ სიტყვას, ყოველთვის აღვნიშნავდით, რომ რუსთავი 2-ის საქმე არის პოლიტიკური საქმე და სიმპათია-ანტიპათიის მიუხედავად, მედია უნდა იყოს დამოუკიდებელი და ჩვენ ამას ყველანაირად ვუჭერთ მხარს“, - ამბობს ბარამიძე.

რაც შეეხება კვირას გასამართ რუსთავი 2-ის მხარდასაჭერ აქციას, ბარამიძემ განაცხადა, რომ მისთვის პრობლემას წარმოადგენს, რომ ამ შეკრების ერთ-ერთი ინიციატორია „ის პოლიტიკური ძალა, რომელიც ჩვენ გვაფიქრებს ამ მხარდაჭერის დროს მეტ პასუხისმგებლობაზე“.

ანა მებურიშვილი