საზოგადოება
ნიკა მელია დავით ნარმანიასთან შეხვედრას ითხოვს
ამ წუთებში თბილისში დედაქალაქის მერიასთან 8 პოლიტიკური პარტიისგან შემდგარი საკოორდინაციო საბჭო „რუსთავი 2“-ისა და სიტყვის თავისუფლების მხარდასაჭერ აქციას მართავს.
აქციაზე შეკრებილი პარტიების ერთ-ერთი მთავარი მოთხოვნაა, დადგეს მერის პასუხისმგებლობის საკითხი, კერძოდ, მოსამართლე ნატო ნაზღაიძის, რომელიც „რუსთავი 2“-ის სასამართლო საქმეს ხელმძღვანელობდა,ოჯახისთვის მრავალმილიონიანი ქონების შესაძლო გადაცემის გამო.
საკოორდინაციო საბჭო დავით ნარმანიას კორუფციულ გარიგებაში ადანაშაულებს.
აქციის ერთ-ერთი ორგანიზატორის , „ერთიანი ნაციონალური მოძრაობის“ პოლიტიკური საბჭოს თავჯდომარის ნიკა მელიას თქმით, მისი მთავარი მიზანია დედაქალაქის მერთან, დავით ნარმანიასთან შეხვედრაა.
„ქრთამი იქნა გადახდილი დედაქალაქის ხელმძღვანელობის მხრიდან მოსამართლის ოჯახისთვის, ამ კონკრეტულ შემთხვევაში პასუხი აქვს გასაცემი... გამოვიდეს ეს ადამიანი და გვითხრას, რომ აღარ შემიძლია, მაძალებს ივანშვილი და სისულელეს სისულელეზე მაკეთებინებს. ამიტომ ჩვენ ახლა მოვითხოვთ დედაქალაქის მერიის შენობაში შესვლასა და შეხვედრას ქონების მართვის სააგენტოს უფროსთან და დედააქალაქის მერთან“, - ამბობს მელია.
აქცია ფიზიკური შეხლა-შემოხლის ფონზე მიმდინარეობს. ნიკა მელია მერიაში შესვლას შეეცადა, თუმცა უსაფრთხოების სამსახურმა მას ამის საშუალება არ მისცა. დაპირისპირებაში საპატრულო პოლიციაც ჩაერთო.
ანა მებურიშვილი