სამართალი
ნიკა მელიას აღკვეთის ღონისძიებად გირაო შეეფარდა
ნიკა მელია თავისუფალია - სასამართლომ პროკურატურის შუამდგომლობა არ დააკმაყოფილა.
გადაწყვეტილება მოსამართლე თემურ გოგოხიამ რამდენიმე წუთის წინ გამოაცხადა, რომლის თანახმადაც მელიამ გირაოს სახით 20 დღის ვადაში 30 ათასი ლარი უნდა გადაიხადოს.
როგორც მოსამართლემ აღნიშნა, მელიას უნდა აეკრძალოს საცხოვრებელი ადგილის დატოვება საგამოძიებო ორგანოს ინფორმირებისა და თანხმობის გარეშე.
დაცვის მხარე 10 ათას ლარიან გირაოს შეფარდებას ითხოვდა.
როგორც ადვოკატმა, გიორგი კონდახიშვილმა შუამდგომლობის წარდგენისას განაცხადა, მელიას დაკავება პოლიტიკურ განეიტრალებას უკავშირდება. ასევე, ადვოკატმა სასამართლოს წარუდგინა წერილი, სადაც აღნიშნული იყო, რომ მელიას დეპუტატები თავდებში უდგებოდნენ.
პროკურატურა მელიასთვის აღკვეთის ღონისძიების სახით პატიმრობას ითხოვდა.
პროკურორმა, ამირან გულუაშვილმა შუამდგომლობის არგუმენტად დაასახელა ის, რომ მელიამ შესაძლოა, მოწმეებზე ზემოქმედება მოახდინოს, ასევე მტკიცებულებების განადგურება მოხდეს.
ნიკა მელიას ბრალი ედება საქართველოს სისხლის სამართლის კოდექსის 225-ე მუხლის პირველი და მეორე ნაწილებით, რაც ჯგუფური ძალადობის ორგანიზებას, ხელმძღვანელობასა და მასში მონაწილეობას გულისხმობს. ბრალის დამტკიცების შემთხვევაში, მელიას ექვსიდან ცხრა წლამდე პატიმრობა ემუქრება.
ამასთან, გუშინ, პარლამენტმა პროკურატურას თანხმობა მისცა, ნიკა მელიასთვის აღკვეთის ღონისძიების სახით პატიმრობის გამოყენების მოთხოვნით სასამართლოს მიმართოს.