მსოფლიო
ნიკოლ ფაშინიანი მართალი იყო, მე შევცდი - სერჟ სარგსიანი
სომხეთის გადამდგარმა პრემიერმა სერჟ სარგსიანმა განცხადება გაავრცელა. მისი თქმით, სიტუაციის მოგვარების რამდენიმე გამოსავალი არსებობდა, რომელზეც ის არ წავიდა.
„ძვირფასო თანამემამულენო!
მივმართავ სომხეთის რესპუბლიკის ყველა მოქალაქეს, უფროს თაობასა და ახალგაზრდობას, ქალებსა და მამაკაცებს.
მივმართავ მათ, ვინც დღე და ღამე დგას ქუჩაში მოწოდებით „უარყავი სერჟი" და მათაც, ვინც ძლივს აღწევს სამუშაო ადგილებამდე, რათა საკუთარი ვალი მოიხადოს.
მივმართავ მათ, ვინც მთელი დღე პირდაპირ ეთერს ადევნებს თვალს და მათაც, ვინც საზოგადოებრივ უსაფრთხოებას უზრუნველყოფს.
მივმართავ მამაც ჯარისკაცებსა და ოფიცრებს საზღვარზე, მივმართავ ჩემს თანამებრძოლებს. მივმართავ ჩემს თანაპარტიელებს, ყველა პოლიტიკურ ძალას და მოღვაწეს.
ნიკოლ ფაშინიანი მართალი იყო. მე შევცდი. შექმნილ სიტუაციას რამდენიმე გამოსავალი აქვს, მაგრამ არცერთს არ გავაკეთებ. არ შემიძლია. მე ვტოვებ ქვეყნის მეთაურის პოსტს, სომხეთის პრემიერ-მინისტრის პოსტს. ქუჩის მოძრაობა ჩემი პრემიერობის წინააღმდეგია. მე ვასრულებ თქვენს მოთხოვნას.
მშვიდობა, ჰარმონია და ლოგიკა ჩვენს ქვეყანას. მადლობას გიხდით“, - წერია სარგსიანის განცხადებაში.
ცნობისთვის, სომხეთის პარლამენტმა სარგსიანი პრემიერად აირჩია 17 აპრილს.
ქვეყანაში მე-11 დღეა სარგსიანის წასვლის მოთხოვნით საპროტესტო აქციები მიმდინარეობს, რომელიც ცნობილია „სამოქალაქო დაუმორჩილებლობის“ სახელით.