პოლიტიკა

ნინო კალანდაძე-სერგო რატიანის განცხადებაზე: ყრილობის ჩატარების ხელის შეშლის მცდელობაა, დაპირისპირება საბოტაჟის სახეს იღებს

ნაციონალური მოძრაობის წევრი ნინო კალანდაძე, სერგო რატიანის განცხადებას იმის შესახებ, რომ 20 იანვრის ყრილობა არალეგიტიმური იქნება, ხელის შეშლის მცდელობად აფასებს.

როგორც კალანდაძემ საკითხის კომენტირებისას მედიას განუცხადა, პარტიაში არსებული დაპირისპირება, ნელ-ნელა, საბოტაჟის სახეს იღებს.

„სამწუხაროდ, არა მხოლოდ კომისია, არამედ რეგიონული ორგანიზაციები, პარტიის თავმჯდომარეები, ვინც არიან ამ წერილის ადრესატები, აღიქვამენ ამას, როგორც ყრილობის ეფექტურად ჩატარების ხელის შეშლის მცდელობად. აშკარაა, რომ ასეთი დაპირსიპება, ნელ-ნელა უკვე საბოტაჟის სახეს იღებს“,-განაცხადა ნინო კალანდაძემ.

მისი თქმით, ჯგუფს, რომელსაც სურს ყრილობის ჩაშლა, რეალურად ყრილობის შედეგის ეშინია.

„თუ წინსწრებით ყრილობას არალეგიტიმურს აცხადებ და მიზეზებს ეძებ, თუ რა შემაფერხებელი ბარიერები გინდა დაუყენო ყრილობას, ეს ნიშნავს იმას,რომ ყრილობის შედეგის ეშინია იმ ჯგუფს, რომელიც ცდილობს ყველა გზით ჩაშალოს ყრილობა და ყველა გზით ხელი შეუშალოს მას. როდესაც ხედავენ, რომ რეალურად ჩაშლის საფრთხე არ არსებობს, ახლა იურიდიულ მიზეზებს ეძებენ“,-აღნიშნა კალანდაძემ.

მონიკა დავლიანიძე