კომენტარი

ობამამ თავისი განცხადებით ხაზი გაუსვა, რომ გაყინული კონფლიქტის არსებობა, რუსეთის „დამსახურებაა“- გუგული მაღრაძე

„ქართული ოცნების“ წევრის გუგული მაღრაძის განცხადებით, რაკი ბარაქ ობამამ ახსენა, რომ რუსეთს საქართველოში გაყინული კონფლიქტი აქვს, ეს ნიშნავს, რომ ადმინისტრაციისთვის ეს საკითხი მნიშვნელოვანია.

ამის შესახებ მაღრაძემ ბარაქ ობამას შესაბამისი შინაარსის განცხადების კომენტირებისას აღნიშნა.

„ბარაქ ობამამ დააფიქსირა თავისი ინტერესი ამ კონფლიქტის მიმართ. რაკი ახსენა, რომ რუსეთს საქართველოში აქვს გაყინული კონფლიქტი, ეს იმას ნიშნავს, რომ ამერიკის შეერთებული შტატების ადმინისტრაციისთვის ეს არის მნიშვნელოვანი და ახსენებენ სწორედ იმიტომ, რომ ხაზი გაუსვან, რომ გაყინული კონფლიქტის არსებობა არის რუსეთის „დამსახურება“ გაცილებით უფრო მეტად, ვიდრე ვთქვათ საქართველო“,-აღნიშნა მაღარაძემ.

შეგახსენებთ, რომ ამერიკის პრეზიდენტმა, იტალიის პრემიერ-მინისტრ მატეო რენცისთან ერთობლივ პრესკონფერენციაზე რუსეთის აგრესიულ ქმედებებზე საუბრისას აღნიშნა, რომ როდესაც პრეზიდენტი გახდა, რუსეთი უკვე იყო „შეჭრილი საქართველოს ტერიტორიაზე და იქ გაყინული კონფლიქტი ჰქონდა შექმნილი“.

მისი თქმით, რუსეთთან დაკავშირებული გამოწვევა უკავშირდება მის აგრესიას გარკვეულ რეგიონებში, „უკრაინაშიც კი, სადაც მათ იგივე ქმედებები განახორციელეს, რაც საქართველოში“.

მონიკა დავლიანიძე