მსოფლიო

ოდესაში ბანაკ „ვიქტორიაში“ გაჩენილი ხანძრის შედეგად 2 გოგო დაიღუპა, ერთ ბავშვს ამ დრომდე ეძებენ

ოდესაში, სპორტულ-გამაჯანსაღებელ ბანაკ „ვიქტორიაში“ ცეცხლი გაჩნდა, რომლის შედეგად 2 გოგო დაიღუპა, ხოლო ერთს ბავშვს ამ დრომდე ეძებენ. 2 არასრულწლოვანი საავადმყოფოშია გადაყვანილი, მედოკოსები მათ მდგომარეობას საშუალოზე მძიმედ აფასებენ.

ხანძრის გაჩენისას ადგილზე 42 ბავშვი იმყოფებოდა.

თავიდან ვრცელდებოდა ინფორმაცია, რომ ცეცხლი მოკლე ჩართვამ გამოიწვია, თუმცა, როგორც სააგენტო Unian.net ოდესის ოლქის ეროვნული პოლიციის მთავარ სამმართველოზე დაყრდნობით იუწყება, ხანძარი ბანაკთან განცალკევებით მდგარ 2-სართულიანი ხის შენობაში მოხდა.

ოდესის პოლიციამ გამოძიება დაიწყო აღნიშნულ ფაქტზე უკრაინის სისხლის სამართლის კოდექსის 270-ე მუხლის მეორე ნაწილით (რაც გულისხმობს კანონმდებლობით დადგენილი სახანძრო უსაფრთხოების მოთხოვნების დარღვევას).

ხანძარი გუშინ საღამოს გაჩნდა. ცეცხლი 450 კვ. მეტრ ტერიტორიას მოედო.

ანა მებურიშვილი