უახლესი ამბები
არქივი
პოლიტიკა
ოკუპანტის სტატუსი, რაც რუსეთს მიენიჭა, ჩვენ გვბლოკავს ყველა მხრივ - სალომე ზურაბიშვილი
პოლიტიკა. სალომე ზურაბიშვილი, რუსეთი, ოკუპაცია
მთაწმინდის მაჟორიტარი დეპუტატობის კანდიდატი, საქართველოს ყოფილი საგარეო საქმეთა მინისტრი სალომე ზურაბიშვილი მიიჩნევს, რომ რუსეთთან საქართველოს მოლაპარაკებების გზა დაბლოკილი აქვს რუსეთისთვის ოკუპანტის სტატუსის მინიჭების გამო.
როგორც ზურაბიშვილმა საზოგადოებრივი მაუწყებლის გადაცემა ,,მთავარში’’ განაცხადა, ვინაიდან საქართველოს გზა არ არის სამხედრო გზა, ქვეყანა ვერ იტყვის უარს დიპლომატიის გზაზე.
,,ყოველთვის არის მოლაპარაკებით შედეგის მიღწევის შესაძლებლობა. ყოველ შემთხვევაში, ყოველთვის საჭიროა ამის მცდელობა. ჩვენ დღეს ვართ დაბლოკილი ამ კუთხითაც. ის ოკუპანტის სტატუსი, რაც მიენიჭა და რაც არის რეალობის სწორი ასახვა, ამავე დროს ჩვენ გვბლოკავს ყველა მხრივ. ჩვენ ვერ ვმონაწილოებთ იმ მოლაპარაკებებში. ჩვენი უცხოელი მეგობრები, პარტნიორები, რომლებიც იცავენ ჩვენს სუვერენობას, ისინი არიან თავისუფალნი, რომ იგივე ამ ოკუპანტს დაელაპარაკონ და ჩვენ არა, თუ არ ჩავთვლით იმ ორმხრივ ფორმატს, რომელიც არის ზურაბ აბაშიძის ფორმატი.
ეს არის ჩვენი შეზღუდვა, იმიტომ, რომ ქვეყანა, რომელსაც არ შეუძლია და რომლის გზაც არასდროს ყოფილა სამხედრო გზა, ვერ ვიტყვით უარს დიპლომატიის გზაზე. ეს დიპლომატიის გზა არ არის დათმობის გზა, აქ უნდა იყოს ძალიან სერიოზული ჯებირები. ამ გზაზე არ შეიძლება დადიოდნენ ოპოზიციონერები, როგორც სცადა რამდენიმემ იმისთვის, რომ თავიანთი პოლიტიკური სტატუსი აემაღლებინა. ეს დიპლომატიური გზა უნდა იყოს ძალიან კარგად შეთანხმებული შიგნით. ეს უნდა იყოს კონსენსუსი ყველა პარტიის და არა ერთის. უნდა ვიცოდეთ, რა გვინდა და რა რის ჩვენი წითელი ხაზები, ეს არის ის, რასაც ჰქვია მოლაპარაკებების მომზადება’’, - განაცხადა სალომე ზურაბიშვილმა.
ნინო ექვთიმიშვილი