კონფლიქტის ზონა

ოკუპირებულ აფხაზეთში პირველი მოსმენით მიიღეს კანონი, რომლითაც ნარკოტიკის გამსაღებლებს ან სამუდამოდ ჩასვამენ ციხეში ან სიკვდილით დასჯიან

ოკუპირებული აფხაზეთის დე-ფაქტო პარლამენტმა პირველი მოსმენით მიიღო კანონპროექტი, რომელიც ნარკოტიკის გასაღებისთვის სასჯელის სახით ითვალისწინებს სამუდამო პატიმრობას ან სიკვდილით დასჯას ქონების ჩამორთმევით.

აფხაზეთის დე-ფაქტო პარლამენტის სახელმწიფო-საკანონმდებლო პოლიტიკის კომიტეტის თავმჯდომარის, ვალერი აგრბას განცხადებით, სანქციების გამკაცრებამ უნდა მოახდინოს გავლენა და შეაჩეროს აფხაზეთში ნარკოტიკული საშუალებების გავრცელების პროცესი. მისივე თქმით, მკაცრდება სასჯელი ნარკოტიკული თრობის ქვეშ სატრანსპორტო საშუალების მართვისთვის და მათ მიმართ, ვისაც მანამდე ადმინისტრაციული სასჯელი დაეკისრა.

საკანონმდებლო ცვლილებებით, სატრანსპორტო საშუალების ნარკოტიკული თრობის მდგომარეობაში მართვისთვის პირი 600 000 რუბლით დაჯარიმდება და მას ერთ წლამდე ვადით ჩამოერთმევა გარკვეული თანამდებობების დაკავება.

მოქმედი კანონდებლობით, სასჯელი ნარკოტიკის გასაღებისთვის ითვალისწინებს 15-დან 20 წლამდე თავისუფლების აღკვეთასა და 3 წლამდე გარკვეული თანამდებობების დაკავების უფლების ჩამორთმევას.