მსოფლიო
ოკუპირებულ ყირიმში ნახევარკუნძულისა და რუსეთის დამაკავშირებელი ხიდი გაიხსნა
რუსეთის მიერ ოკუპირებულ ყირიმში, ქერჩის სრუტეში კრასნოდარის ოლქისა და ნახევარკუნძულის დამაკავშირებელი ხიდის საავტომობილო ნაწილი ოფიციალურად გაიხსნა.
ღონისძიებაში მონაწილეობა მიიღო რუსეთის პრეზიდენტმა ვლადიმერ პუტინმა. ის მართავდა КамАЗ-ს, ხოლო პუტინს მწკრივში მიჰყვებოდნენ ავტომანქანები და სატვირთო ტექნიკა, რომელიც იყო ჩართული ხიდის მშენებლობაში.
მოძრაობა ხიდზე ხვალიდან დაიწყება. მასზე ივლიან მსუბუქი მანქანები და სამგზავრო ავტობუსები.
ქერჩის ხიდის სარკინიგზო ნაწილის დასრულება 2019 წლისთვისაა დაგეგმილი.
ხიდის მშენებლობა 2016 წლის თებერვლიდან დაიწყო. პროექტის ღირებულებაა 227.9 მილიარდი რუბლი. საავტომობილო მოძრაობა დაგეგმილზე ნახევარი წლით ადრე დაიწყო.
ცნობისთვის, უკრაინის პრეზიდენტმა პეტრო პოროშენკომ ბრძანა, ეჩივლა რუსეთისთვის ქერჩის ხიდის მშენებლობისას მიყენებული ეკოლოგიური ზიანის გამო.
უკრაინა ქერჩის ხიდის მშენებლობის შეთანხმებიდან გავიდა 2014 წელს, მას შემდეგ, რაც რუსეთმა ყირიმის ანექსია მოახდინა.