პოლიტიკა
ოლიგარქები ყველგან ჩვენი მტრები არიან და ახლა ისინი არიან მორყეულები - მიხეილ სააკაშვილი
საქართველოს ყოფილი პრეზიდენტი და ოდესის ექს-გუბერნატორი მიხეილ სააკაშვილი ამჟამად დანიის დედაქალაქ კოპენჰაგენში იმყოფება, სადაც „ევროპის სახალხო პარტიის“ ყრილობას ესწრება. როგორც მან „რუსთავი 2“-თან ინტერვიუში განაცხადა, ბოლო პერიოდში მას მჭიდრო კონტაქტი აქვს „ევროპის სახალხო პარტიის“ წევრებთან და ევროპარლამენტარებთან.
„EPP-ის ხელმძღვანელობასთან, ევროპარლამენტის წევრებთან ბოლო კვირები სულ მაქვს ურთიერთობა. უპირველეს ყოვლისა, ეს არის სიტუაცია, რომელიც ჩემ გარშემო შეიქმნა უკრაინაში. უკრაინაში მე ვარ ყველაზე სწრაფად მზარდი პოლიტიკური პარტიის ლიდერი და ისინი ხელოვნურად ცდილობენ, ჩამომაშორონ პოლიტიკურ საქმიანობას“, - თქვა სააკაშვილმა.
ოდესის ყოფილი გუბერნატორის მტკიცებით, როგორც საქართველოში, ასევე უკრაინაში ოლიგარქები მორყეულები არიან. სააკაშვილმა აღნიშნა, რომ ქართული ოპოზიცია ამით უნდა ისარგებლოს.
„საქართველოში სიტუაცია ძალიან სწრაფად ვითარდება. ოლიგარქები ყველგან ჩვენი მტრები არიან და ოლიგარქები ყველგან ახლა არიან მორყეულები. ამ მომენტის გაშვება არ შეიძლება არც ქართული ოპოზიციისთვის, არც იმ ხალხისთვის, ვინც მე მხარს მიჭერს უკრაინაში, ჩვენი მხარდამჭერებისთვის საქართველოსა და უკრაინაში“, - განაცხადა სააკაშვილმა.
სააკაშვილის თქმით, მას მხარს უჭერენ ქართული და უკრაინული დიასპორები.
26 ივლისს გახდა ცნობილი, რომ მიხეილ სააკაშვილს უკრაინის მოქალაქეობა ჩამოართვეს. მიუხედავად ამისა, ის უკრაინაში დაბრუნებას 10 სექტემბერს გეგმავს პოლონეთის მხრიდან.
ანა მებურიშვილი