პოლიტიკა
ომბუდსმენის შენიშვნებსა და რეკომენდაციებს გავეცნობით - შალვა ხუციშვილი
შინაგან საქმეთა მინისტრის მოადგილე შალვა ხუციშვილი გამოეხმაურა სახალხო დამცველ უჩა ნანუაშვილის ანგარიშს, რომელიც სამართალდამცავების მხრიდან უფლებამოსილების გადაჭარბების ტენდენციის ზრდას ეთმობა.
ხუციშვილის განცხადებით, შსს-ში მაშინ მიიღებენ გადაწყვეტილებას, გაიზიარებენ თუ არა ომბუდსმენის რეკომენდაციებს, როცა მის ანგარიშს დეტალურად გაეცნობიან.
„ანგარიშის ეს ნაწილი ჩვენთვის უცნობია, ამას უფრო დეტალური ანალიზი და შეფასება სჭირდება. როდესაც გავეცნობით, ჩვენი პოზიცია ამის შესახებ ცნობილი გახდება. რაც შეეხება ჩვენს მიდგომას, უმეტეს შემთხვევაში რაციონალური და დასაბუთებულია. ჩვენ ვიზიარებთ სახალხო დამცველის მოსაზრებებს, მაგრამ ხდება, როცა არაარგუმენტირებული მსჯელობაა და მის პოზიციებს არ ვიზიარებთ“, -განაცხადა ხუციშვილმა.
შეგახსენებთ, რომ დღეს სახალხო დამცველმა მედიას წარუდგინა 2016 წლის საპარლამენტო ანგარიში საქართველოში ადამიანის უფლებათა და თავისუფლებათა დაცვის მდგომარეობის შესახებ.
843-გვერდიან დოკუმენტში საუბარია სასამართლო და პენიტენციურ დაწესებულებებში არსებულ მდგომარეობაზე. ვრცელი ანგარიში 30 თავისგან შედგება.
ანა მებურიშვილი