სამართალი

ომბუდსმენმა მთავარ პროკურორს ბექა ბექაურის მიმართ შესაძლო არასათანადო მოპყრობის ფაქტზე გამოძიების დაწყების მოთხოვნით მიმართა

სახალხო დამცველის უჩა ნანუაშვილის განცხადებით, ტერორიზმის ბრალდებით დაკავებული ბექა ბექაურის მიმართ შესაძლოა სახეზე იყოს არასათანადო მოპყრობის ფაქტი სამართალდამცველების მხრიდან. ამის შესახებ უჩა ნანუაშვილმა ბექა ბექაურის მონაყოლსა და პაციენტის სამედიცინო დოკუმენტაციაზე დაყრდნობით, დღეს გამართულ ბრიფინგზე განაცხადა. ნანუაშვილის თქმით, მან დღესვე მიმართა მთავარ პროკურორს, ბექა ბექაურის მიმართ განხორციელებული შესაძლო არასათანადო მოპყრობის ფაქტზე მყისიერი გამოძიების დაწყების მოთხოვნით.

,,ბრალდებულის განმარტებით, იგი დაექვემდებარა არასათანადო მოპყრობას დაკავებისას, კერძოდ, შუბლის ძვალი ჩაუმტვრიეს კონდახით, რის გამოც, დაკარგა გონება და არ ახსოვს, როდის გადაუმტვრიეს თითები. ამასთან, ბექა ბექაურის მტკიცებით, მისი დაკავება განხორციელდა 20 აგვისტოს, დაახლოებით 12:00 საათზე და მიუხედავად თავის ქალის ღია ჭრილობისა და მარცხენა მტევნის დაზიანებისა, დაახოებით ღამის 11 საათამდე მას არანაირი სამედიცინო დახმრება არ აღმოუჩინეს.

სამედიცინო დოკუმენტები ცხადყოფს, რომ ბექა ბექაური დაახლეობით 23:00 საათზე შეიყვანეს დროებითი მოთავსების იზოლატორში, თუმცა ვერ მიიღო იზოლატორმა არსებული მრავლობითი დაზიანების გამო, როგორც ხდება ტრადიციულად. მრავლობითი დაზიანებების გამო, ბრალდებული ორჯერ იქნა გადაყვანილი სამედიცინო დაწესებულებებში, სადაც საბოლოო ჯამში ჩაუტარდა ქირურგიული მკურნალობა. ამრიგად, შესაძლებელია სახეზე იყოს ბექა ბექაურის მიმართ არასათანადო მოპყრობის ფაქტი სამართალდამცავი ორგანოების წარმომადგენლების მხრიდან. ამავდროულად, მრავლობითი დაზიანებების მიუხედავად, ბრალდებულს დაახლოებით 11 საათის განმავლობაში არ გაეწია არანაირი სამედიცინო დახმარება, რაც თავის მხრივ, შესაძლოა დამატებით მიუთითებდეს მის მიმართ არასათანადო მოპყრობის ფაქტზე“, - განაცხადა უჩა ნანუაშვილმა და აღნიშნა, რომ ბექა ბექაურისგან ეს ინფორმაცია დღეს მიიღეს, გუშინ, კი პაციებტი თავს სუსტად გრძნობდა და მომხდარზე ვერ ისაუბრა.

,,აღსანიშნავია, რომ გუშინ, დაახლოებით ერთი საათის განმავლობაში რწმუნებულებმა ვერ შეძლეს ბრალდებულის მონახულება, რაც სამედიცინო დაწესებულების თანამშრომლებმა უსაფრთხოების სამსახურის მიერ ნებართვის გაუცემლობით ახსნეს“, - განაცხადა უჩა ნანუაშვილმა.

მარი ნამგალაძე