კომენტარი
ომბუდსმენზე მორიგი თავდასხმაა, იმიტომ რომ ის ხელისუფლებას აკრიტიკებს - გიორგი ტუღუში
„ევროპული საქართველოს“ წევრის გიორგი ტუღუშის აზრით, მიმდინარეობს მორიგი თავდასხმა ომბუდსმენზე, იმიტომ რომ ის ხელისუფლებას აკრიტიკებს.
ამის შესახებ ტუღუშმა, თეა წულუკიანის მიერ უჩა ნანუაშვილზე დღეს გაკეთებული განცხადების კომენტირებისას აღნიშნა.
„მორიგი თავდასხმა სახალხო დამცველზე. რომ ის აკრიტიკებს ხელისუფლებას და ის, რომ იგი არის ანგაჟირებული, პოლიტიზებული, - არაერთი მაღალი პოლიტიკური თანამდებობის პირისგან მოვისმინეთ. ეს არის სამწუხარო ტენდენცია. უფრო კარგი იქნებოდა, ხელისუფლების მხრიდან გაკეთდეს განცხადებები თუ როგორ აპირებენ შეასრულონ სახალხო დამცველის რეკომენდაციები“,-აღნიშნა ტუღუშმა.
საქართველოს იუსტიციის მინისტრმა - თეა წულუკიანმა უჩა ნანუაშვილს საქართველოში ყველაზე უსამართლო ომბუდსმენი უწოდა.
ამის მიზეზი ნანუაშვილის მიერ გუშინ გამოქვეყნებული ანგარიში გახდა, რომელიც ე.წ ციანიდის საქმის მონიტორინგს შეეხებოდა.
მონიკა დავლიანიძე