მოზაიკა

ოპერისა და ბალეტის სახელმწიფო თეატრის სამხატვრო ხელმძღვანელის ვინაობა სავარაუდოდ დღეს გახდება ცნობილი

კულტურისა და ძეგლთა დაცვის სამინისტროში სარეკომენდაციო საბჭოს სხდომა მიმდინარეობს, რომელმაც კულტურის მინისტრ მიხეილ გიორგაძეს ოპერისა და ბალეტის სახელმწიფო თეატრის სამხატვრო ხელმძღვანელის კანდიდატი უნდა წარუდგინოს. სარეკომენდაციო საბჭო 11 წევრისგან შედგება, მათ შორისაა თავად კულტურის მინისტრი, მინისტრის მოადგილე მანანა ბერიკაშვილი, მხატვარი გოგი ალექსი -მესხიშვილი, მოსკოვის დიდი თეატრის სოლისტი მაყვალა ქასრაშვილი, მუსიკათმცოდნე მანანა ახმეტელი, დირიჟორი ზაზა აზმაიფარაშვილი, დირიჟორი ვახტანგ კახიძე. საბჭოს წევრები არიან, აგრეთვე, პრიმა ბალერინა ნინო ანანიაშვილი და რეჟისორი გიზო ჟორდანია, რომლებიც დღევანდელ შეხვედრაზე არ იმყოფებიან და საკუთარი წარმომადგენლების მეშვეობით დააფიქსირებენ პოზიციას.

ფარული კენჭისყრის პროცესში მონაწილეობას მიიღებს მიხეილ გიორგაძეც, კანდიდატი ხმათა უმრავლესობით გამოვლინდება და მას საბოლოოდ, მინისტრი დაამტკიცებს.

კომისიის წევრებმა კენჭისყრაზე შესვლამდე ჟურნალიტებთან არ დააკონკრეტეს, თუ რომელ კანდიდატს უჭერენ მხარს.

რაც შეეხება კანდიდატებს, არსებული ინფორმაციით, მათ შორისაა ოპერისა და ბალეტის თეატრის ყოფილი ხელმძღვანელი დავით კინწურაშვილი, რომლის გადადგომასაც ოპერის თეატრის დასის ნაწილი რამოდენიმე თვის განმავლობაში ითხოვდა და საბოლოოდ, სამი თვის წინ, მინისტრის გადაწყვეტილებით გათავისუფლდა პოსტიდან. კანდიდატთა შორის ასევე არიან: მეცო-სოპრანო მზია ნიორაძე, სოპრანო ირინე რატიანი, მოსკოვის დიდი თეატრის სოლისტი ბადრი მაისურაძე და მუსიკოსი ბადრი ბაგრატიონ-გრუზინსკი.

მარი ნამგალაძე