სამართალი
ოპოზიცია ლაშა თორდიას ცემის ფაქტზე საგამოძიებო კომისიის შექმნის ინიციატივას ბიუროს სხდომაზე დააყენებს
საპარლამენტო უმცირესობა, ბიუროს დღევანდელ სხდომაზე, მთავარი აუდიტორის, ლაშა თორდიას ცემის ფაქტზე, საგამოძიებო კომისიის შექმნის საკითხს დააყენებს.
როგორც „ევროპული საქართველოს“ წევრმა სერგო რატიანმა მედიას განუცხადა, პარტიის წევრებს გამოძიების ობიექტურობის არ სჯერათ.
„აუცილებელია, რომ პარლამენტმა ძალიან სწრაფად გადაწყვიტოს, რომ შეიქმნას კომისია და გამოძიებული იყოს საკითხი, რომელიც საკმაოდ რეზონანსული არის და საკმაოდ ლახავს ჩვენი სახელმწიფოს რეპუტაციას“,-აღნიშნა რატიანმა.
ვიცე-სპიკერი, საპარლამენტო უმრავლესობის წევრი გია ვოლსკი კომისიის შექმნას არ გამორიცხავს, იმ შემთხვვეაში, თუ საგამოძიებო პროცესი არასათანადოდ იქნა წარმართული.
„შემოთავაზებაზე უარის თქმა არ ნიშნავს მხოლოდ პარტიულ დაპირისპირებას, აზრთა სხვაობას. კომისიის შექმნას არ გამოვრიცხავ იმ შემთხვევაში თუკი, ეს პროცესი არ იქნა სათანადოდ წარმართული“,-განაცხადა ვოლსკიმ.
მონიკა დავლიანიძე