არქივი
პოლიტიკა
ოპოზიცია ,,ომეგა ჯგუფთან` დაკავშირებით მიმდინარე მოვლენებზე პარლამენტში ფინანსთა მინისტრის მისვლას ითხოვს
პარლამენტის ფრაქცია "ნაციონალური მოძრაობა" "ურჩი მინისტრების" მიმართ სანქციების გატარებას ითხოვს. შესაბამისი წერილით ოპოზიციურმა ფრაქციამ პარლამენტის თავმჯდომარეს მიმართა.
როგორც ფრაქციის თავმჯდომარემ, რომან გოცირიძემ პარლამენტის საფინანსო-საბიუჯეტო კომიტეტის სხდომაზე განაცხადა, იმ მინისტრების მიმართ, რომლებიც პარლამენტში არ მოდიან, რეგლამენტის შესაბამისად, სანქციები უნდა გატარდეს.
"ჩვენ გავუგზავნეთ წერილი პარლამენტის თავმჯდომარეს და მოვითხოვთ, მოახდინოს რეაგირება სანქციების გატარების კუთხით იმ მინისტრების მიმართ, რომლებიც ურჩობენ და პარლამენტში არ მოდიან. პარლამენტის თავმჯდომარემ ამ საკითხში უნდა ჩართოს საპროცედურო საკითხთა კომიტეტი და უნდა იქნას დაწყებული პროცედურები რეგლამენტის შესაბამისად", - განაცხადა რომან გოცირიძემ.
უმცირესობის წევრმა ეს განცხადება გააკეთა ფინანსთა მინისტრის, ივანე მაჭავარიანის პარლამენტში მოწვევის საკითხზე საუბრისას. კერძოდ, მანამდე კომიტეტის სხდომაზე პარტია "თავისუფალი საქართველოს" თავმჯდომარემ, კახა კუკავამ მოითხოვა, რომ "ომეგა ჯგუფთან" დაკავშირებით მიმდინარე მოვლენებზე პარლამენტში ფინანსთა მინისტრი მივიდეს.
გოცირიძე კუკავას ინიციატივას იზიარებს და მიიჩნევს, რომ მაჭავარიანმა შესაბამის კითხვებს უნდა უპასუხოს.