საზოგადოება
ოპოზიცია საყდრისის საკითხთან დაკავშირებით საზოგადოებრივი ფონდის შექმნას არ გამორიცხავს
ოპოზიციური პოლიტიკური პარტიები ეკონომიკის სამინიტროს მიერ, საყდრისის საკითხთან დაკავშირებით, მოთხოვნის უგულებელყოფის შემთხვევაში საზოგადოებრივი ფონდის შექმნასა და შპს RMG Gold-თვის კონკურენციის გაწევას გეგმავენ.
”ახალი საქართველოს” პოლიტიკურმა მდივანმა პაატა მანჯგალაძემ განაცხადა, რომ აუქციონი თუ არ შეჩერდება, პარტიები საზოგადოებას მოუწოდებენ ფონდში შემოწირულობა შეიტანონ, რათა მიწის გამოსყიდვა შესაძლებელი გახდეს.
პაატა მანჯგალა საქმეში ხელისუფლების ინტერესებს ხედავს, რადგან მემკვიდრეობის ძეგლის სტატუსის შეცვლა უცებ მოხდა.
„იმისთვის, რომ ზუსტად გავიაზროთ რაც იქ ხდება, დღეს, აუცილებელია ვიცოდეთ წინა პერიოდი, როცა საყდრისის აფეთქება მოხდა. როცა კომისიამ შეუცვალა მემკვიდრეობის ძეგლის სტატუსი, იქ იყვნენ ადამიანები, დამოუკიდებელი ექსპერტების სახით, რომლებიც პირდაპირ დაკავშირებულნი იყვნენ “RMG GOLD”-თან, ეს დადასტურებული ფაქტია. ასევე ვიცით, რომ როცა მთავარი პროკურორი გადადგა პირდაპირ ამ კომპანიის ინტერესების დამცველი გახდა. ასეთი მაღალი ლობირება ხელისუფლების მხრიდან, მაღალი ალბათობის ეჭვს ბადებს, რომ აქ არის ხელისუფლების ინტერესი, რადგან ძეგლისთვის უცებ მოხდა სტატუსის შეცვლა, ახლაც ფაქტობრივად ეკოციდია ადგილზე და არცერთი სახელმწიფო უწყება, რომელიც პასუხისმგებელია ადამიანების ჯანმრთელობაზე, ადგილზე კვლევებს არ ატარებს“-განაცხადა მანჯგალაძემ
შეგახსენებთ, რომ 13 პოლიტიკურმა პარტიამ საქართველოს ეკონომიკისა და მდგრადი განვითარების მინისტრს დიმიტრი ქუმსიშვილს და ქონების ეროვნული სააგენტოს თავმჯდომარეს ეკატერინე სისაურს განცხადებით მიმართა. ოპოზიცია სოფელ დიდ დმანისში შპს RMG Gold-ის მომიჯნავედ 16 ჰა მიწის ნაკვეთზე გამოცხადებული ელექტრონული აუქციონის გაუქმებას ითხოვს.