საზოგადოება
ორჯერ გაძარცვული „გიგის წვენები“ 20 000 ლარით დააზღვიეს
რამდენიმე დღის წინ მზიურის პარკში მდებარე „გიგის წვენების“ ჯიხური მეორედ გაქურდეს. დაუდგენელმა პირებმა მოიპარეს თანხა. სამი კვირის წინ კი წვენსაწური წაიღეს. მომხდარს გამოეხმაურა ერთ-ერთი სადაზღვეო კომპანია, რომელმაც მსგავსი შემთხვევებისგან თავის დაზღვევის მიზნით, ჯიხურის მფლობელ გიგი ანთაძეს 20 000 ლარის ღირებულების სადაზღვევო პოლისი გადასცა.
იმ შემთხვევაში, თუ „გიგის წვენები“ კვლავ დაზარალდება ძარცვის ან ყაჩაღობის მიზეზით, ან თუნდაც ხანძრისა და სტიქიური მოვლენების შედეგად, კომპანია „ჯიპიაი“ ზარალს აუნაზღაურებს.
ცნობისთვის, აღნიშნული ჯიხური თბილისის მერმა კახა კალაძემ 15 წლის გიგის რამდენიმე თვის წინ ბიზნესსაქმიანობისთვის გადასცა. მაშინ კალაძემ აღნიშნა, რომ ანთაძეს ცერებრალური დამბლა აქვს, წლებია რუსთაველის გამზირზე, საკუთარი საცხოვრებლის სიახლოვეს სხვადასხვა სახის ნივთებს ყიდდა და გარე ვაჭრობის შესახებ რეგულაციებს შესაძლოა, მისთვის გარკვეული პრობლემები შეექმნა.