კონფლიქტის ზონა

ოსურმა მხარემ არჩილ ტატუნაშვილის ცხედრის გადმოცემაზე უარი თქვა

ერგნეთში, ინცინდენტების პრევენციისა და მათზე რეაგირების მექანიზმის ჯგუფის არაგეგმური შეხვედრა, რომელიც სახელმწიფო უსაფრთხოების სამსახურის მოთხოვნით გაიმართა, დასრულდა.

შეხვედრის დასრულების შემდეგ დე-ფაქტო რეჟიმის წარმომადგენლებმა ქართულ მედიასთან კომენტარზე უარი განაცხადეს.

სახელმწიფო უსაფრთხოების სამსახურის წარმომადგენელმა კახა ქემოკლიძემ კი განაცხადა, რომ შეხვედრაზე დე-ფაქტო ცხინვალის წარმომადგენლებმა ოკუპირებულ ტერიტორიაზე გარდაცვლილი არჩილ ტატუნაშვილის ცხედრის გადმოცემაზე ამ ეტაპზე უარი განაცხადეს.

უარის მიზეზად კი, ოკუპირებული ცხინვალის წარმომადგენელმა მურად ჯიოევმა რუსეთის ფედერაციიდან ექსპერტების ჩართვა დაასახელა და განაცხადა, რომ ცხედარს ოჯახს რამდენიმე დღეში გადმოსცემენ, ცხედრის ექსპერტიზის დასკვნის მიღების შემდეგ გადასცემენ.

რაც შეეხება ტატუნაშვილთან ერთად დაკავებულ საქართველოს ორ მოქალაქეს, ლევან ქუტაშვილს და იოსებ პავლიაშვილს, რომლებიც ოკუპირებული ახალგორის ტერიტორიაზე იმყოფებიან და საქართველოს ცენტრალური ხელისუფლების კონტროლირებად ტერიტორიაზე გადმოსვლას ვერ ახერხებენ, ქართულმა მხარემ ერგნეთში გამართულ არაგეგმურ შეხვედრაზე კონკრეტული პასუხი ვერც ამ ორი პირის გათავისუფლებაზე მიიღო.

სუს-ის წარმომადგენლის, კახა ქემოკლიძის თქმით, დე ფაქტო ცხინვალის წარმომადგენლებთან კომუნიკაცია დღის ბოლომდე კიდევ შედგება და ქართულ მხარეს იმედი აქვს, რომ უფრო კონკრეტულ პასუხებს მიიღებენ.