სამართალი

ოთარ ფარცხალაძე ,,ომეგა ჯგუფის“ საქმესა და ე.წ. სარდაფის ინციდენტთან დაკავშირებით გამოიკითხება - პროკურორი

ყოფილი გენერალური პროკურორი ოთარ ფარცხალაძე ,,ომეგა ჯგუფის“ საქმესა და ე.წ. სარდაფის ინციდენტთან დაკავშირებით გამოიკითხება. შესაბამისი განცხადება ჟურნალისტებთან პროკურორმა ემზარ გაგნიძემ გააკეთა.

მისი თქმით, ის ფაქტი, რომ ყოფილ მთავარ პროკურორს ბრალი უკვე წარედგინა ლაშა თორდიას ცემის ფაქტზე, მეტყველებს იმაზე, რომ გამოძიების მიმართ კითხვის ნიშნები არ არსებობს.

,,არ არსებობს არანიარი კითხვის ნიშანი იმისა, რომ ,,ომეგა ჯგუფი“ საქმესთან დაკავშირებითაც მოხდება მისი გამოკითხვა.

,,ომეგა ჯგუფთან“ დაკავშირებით ჩატარდება ყველა ის საჭირო საგამოძიებო მოქმედება, რომელიც უწყეტ რეჟიმში ახლაც მიმდინარეობს. ყველა ის პირი, რომლის ბრალეული ქმედებებიც დადგინდება, რა თქმა უნდა, ამასთან დაკავშირებით შესაბამის ინფორმაციას მოგაწვდით.

რაც შეეხება ოთარ ფარცხალაძის გამოკითხვის საკითხს, როგორც უკვე აღვნიშნე, ოთარ ფარცხალაძეს ბრალი უკვე წარდგენილი აქვს სხვა სისხლის სამართლის საქმეზე, რაზეც ახლა აქ ვიმყოფებით და რა თქმა უნდა, არ არსებობს იმის კითხვის ნიშანი, რომ ოთარ ფარცხალაძე “ომეგა ჯგუფის” საქმესთან დაკავშირებითაც გამოიკითხება.

მინდა უფრო მეტიც მოგახსენოთ, რომ ამ ეტაპისთვის მიმდინარეობს საგამოძიებო მოქმედებები. საგამოძიებო მოქმედების სპეციფიკიდან გამომდინარე, გამომძიებელი თავად საზღვრავს ტაქტიკას, რა რის შემდეგ უნდა განხორციელდეს, საქმის ინტერესიდან გამომდინარე.

ამ ეტაპისთვის არ არის გამოკითხული, თუმცა ვადასტურებ, რომ გამოძიებისთვის არ არსებობენ ხელშეუხებელი პიროვნებები და ყველა ის პირი გამოიკითხება, ყველა საჭირო მტკიცებულება იქნება მოპოვებული, რომელიც საქმის გახსნას შეუწყობს ხელს“, - განუცხადა ჟურნალისტებს ემზარ გაგნიძემ.