სამართალი

ოთარ ფარცხალძესთან სტუმრობა საგამოძიებო მოქმედებებთან კავშირში არ არის - შალვა ხუციშვილი

საქართველოს შინაგან საქმეთა მინისტრის მოადგილის, შალვა ხუციშვილის განცხადებით, შინაგან საქმეთა სამინისტროში 40 ათასი ადამიანი მუშაობს და შეიძლება, ვინმე პირადი ურთიერთობების გამო იმყოფებოდა ფარცხალაძესთან სახლში.

ამის შესახებ ხუციშვილმა იმ გავრცელებულ ინფორმაციაზე საუბრისას განაცხადა, რომლის თანახმად, გვიან ღამით, ყოფილ პროკურორთან ოთარ ფარცხალაძესთან სახლში, შსს-ს თანამშრომლები იმყოფებოდნენ.

როგორც მინისტრის მოადგილემ აღნიშნა, რამდენადაც მისთვის არის ცნობილი, უწყების თანამშრომლების სტუმრობა საგამოძიებო მოქმედებებთან კავშირში არ არის.

„რამდენადაც ჩემთვის ცნობილია, ეს საგამოძიებო მოქმედებებთან დაკავშირებული არ არის. ეს გამომძიებლების კომპეტენციაა და მათ უნდა ჰკითხოთ. თქვენ იმ ადამიანების კომენტარები ნახეთ, რომლებიც უშუალოდ საგამოძიებო მოქმედებებს ახორციელებენ. მე მეტი რა კომენტარი უნდა გავაკეთო? ჩემი მხრიდან არაკომპეტენტური იქნება რაიმე დამატებით ვისაუბრო. როგორც მინისტრის მოადგილე, ამ საკითხზე კომენტარს ვერ გავაკეთებ. რასაც გამომძიებლები გვეუბნებიან, იმას მოუსმინეთ“,- აღნიშნა შალვა ხუციშვილმა.

მონიკა დავლიანიძე