სამართალი

პაატა ბურჭულაძე მის გამოკითხვას მოსამართლის თანდასწრებით ითხოვს

პაატა ბურჭულაძე, რომელიც ფონდ "იავნანადან" თანხების გაფლანგვის საქმეზე პროკურატურაში მოწმის სახით გამოკითხვაზეა დაბარებული, ხვალ საგამოძიებო უწყებაში არ გამოცხადდება.

ბურჭულაძე გამოკითხვას მოსამართლის თანდასწრებით ითხოვს.

მისი ადვოკატის, სოსო ბარათაშვილის განმარტებით, ბურჭულაძე გამოძიებასთან თანამშრომლობისთვის მზად არის, თუმცა დატვირთული გრაფიკის გამო, საქართველოში ჩამოსვლას ჯერჯერობით ვერ ახერხებს.

„ბატონი პაატა მზად არის მისცეს ჩვენება, ოღონდ ამ ჩვენებას მისცემს სასამართლოში. ინფორმირებულია პროკურატურა ამის შესახებ, მაგრამ კონკრეტულად რომელ დღეს მისცემს სასამართლოში ჩვენებას, ეს უკვე არის შეთანხმების საგანი და რამდენიმე დღეში ეს შეთანხმებაც მოხდება. რასაკვირველია, არის თანამშრომლობა საგამოძიებო ორგანოსთან, ოღონდ ეს არის სასამართლოს გზით.

მას აქვს კონცერტები, როგორც ვიცი, ჯერ პეტერბურგში და შემდეგ მონტე-კარლოში. ფაქტობრივად, ამის შემდეგ, ის იქნება თავისუფალი და ეს იქნება ან დეკემბრის ბოლოს ან იანვრის დასაწყისში,“ - განმარტა სოსო ბარათაშვილმა.