საზოგადოება

პაატა იმნაძე მოსახლეობას ზაფხულის სეზონისთვის დამახასიათებელი საფრთხეების თავიდან ასაცილებლად რეკომენდაციებს აძლევს

დაავადებათა კონტროლისა და საზოგადოებრივი ჯანმრთელობის ეროვნული ცენტრის სამეცნიერო საბჭოს თავმჯდომარე პაატა იმნაძე მოსახლეობას ზაფხულის სეზონისთვის დამახასიათებელი საფრთხეების თავიდან ასაცილებლად რეკომენდაციებს აძლევს.

იმნაძე მოსახლეობას ჰიგიენის წესების მკაცრ დაცვას, განსაკუთრებით კი, ხელების ხშირ დაბანას ურჩევს.

მისივე თქმით, სეზონზე აუცილებელია საკვები პროდუქტების მაცივარში მოთავსება.

„საკმაოდ მაღალი რისკია ნაწლავთა ინფექციების – სალმონელოზი, კამპილობაქტერიოზი, ასევე ნოროვირუსული ინფექციები, რომელსაც ხშირად ენტეროვირუსს უწოდებენ და ბევრი სხვა დაავადება, რომელიც შეიძლება ტემპერატურული რეჟიმის დაუცველობას, საკვების მომზადების დროს მის დაბინძურებას მოჰყვეს. ეს არის მცირე, მაგრამ არსებული რისკი – ტკიპებით გადაცემადი დაავადებების“, – განაცხადა იმნაძემ.

მისივე ინფორმაციით, პრაქტიკულად, მალარიის რისკი ქვეყანაში არ არის.

„ახლაც მიმდინარეობს შავი ზღვისპირეთში დამუშავება სახელმწიფო პროგრამით, კოღოების საწინააღმდეგო ღონისძიებები. წყალი თუ არის ცენტრალიზებული, თუ დეზინფექცირდება პრობლემა არ არის. თუ წყლის ხარისხში გვაქვს ეჭვი, მარტივი გამოსავალია – ერთი წუთი დუღილი და ნებისმიერი წყალი უსაფრთხოა“, – განაცხადა იმნაძემ.