საზოგადოება

პაატა პავლიაშვილის ცხედრის ექსპერტიზის დასკვნა 45 დღეში გახდება ცნობილი

ნუცუბიძის პლატოზე მომხდარი ინციდენტის დროს გარდაცვლილი პაატა პავლიაშვილის ცხედრის ექსპერტიზის დასკვნა, მინიმუმ 45 დღეში გახდება ცნობილი.

ამის შესახებ მედიას სამხარაულის სახელობის სამედიცინო ბიუროს ადმინისტრაციის ხელძმღვანელმა თამარ მელაშვილმა განუცხადა.

მისი თქმით, ეს დამოკიდებულია სხვადასხვა გარემოებებზე.

„მათ შორის თუ საჭირო ხდება კონკრეტული სპეციალური ექსპერტის მოწვევა, რომელიც ჩვენ შეიძლება არ გვყავდეს. ამ შემთხვევაში ჯანდაცვის სამინისტროს მივმართავთ და სამინისტრო გამოყოფს კონკრეტულ ექსპერტს. ამიტომ ეს ზოგჯერ დიდ დროს მოითხოვს“,- განმარტა მელაშვილმა.

რაც შეეხება საკითხს, თუ რატომ გადაიყვანეს პავლიაშვილის ცხედარი ექსპერტიზაზე რუსთავის განყოფილებაში, მელაშვილმა განმარტა, რომ 25 ოქტომბერს ცხედრებისთვის განკუთვნილი ლიფტის სარემონტო სამუშაოები მიმდინარეობდა.

„ცხრა გზით მიცვალებულების აყვანა განყოფილებაში არ ხდება. ამიტომ, როდესაც არის ასეთი სიტუაცია და საჭიროა პროფილაქტიკური სარემონტო სამუშაოების ჩატარება, წინასწარ შინაგან საქმეთა სამინისტროს ვატყობინებთ, რომ არ შეფერხდეს საგამოძიებო პროცესი. ამ დროს განსაკუთრებით მობილიზებულია რუსთავის განყოფილება, რომელიც ყველაზე ახლოს არის და საჭიროების შემთხვევაში გორის ჩვენი განყოფილება“,-განმარტა მელაშვილმა.

მონიკა დავლიანიძე